Ըստ «Դատալեքս» տեղեկատվական կայքի՝ Երեւան քաղաքի բնակիչ, 1979թ. ծնված Հայկ Տոնոյանին մեղադրանք էր առաջադրվել, որ նա աշխատելով «Ճանապարհային ոստիկանություն» ծառայության 2-րդ սպայական գումարտակի 5-րդ սպայական վաշտի 1-ին դասակում, որպես վարչական գործունեության ավագ տեսուչ, պաշտոնական դիրքն օգտագործելով՝ 2010-2012 թվականներին կեղծ անդորրագրեր կազմելու միջոցով յուրացրել է վարչական իրավախախտումներ կատարած անձանցից գանձված եւ պետբյուջե վճարելու համար ի պաշտոնե նրան վստահված 5 միլիոն 216 հազար դրամը:
Տոնոյանը մեղադրվում էր նաեւ այն բանում, որ նշված ժամանակահատվածում ծառայության նկատմամբ անբարեխիղճ եւ անփույթ վերաբերմունքի հետեւանքով իր պարտականությունները չի կատարել, այն է՝ տուգանքները բռնագանձելու համար ճանապարհային երթեւեկության կանոնները խախտած վարորդների վերաբերյալ կազմված, սակայն չվճարված, վիճահարույց 174 արձանագրությունները սահմանված կարգով դատարան չի ուղարկել, ինչի հետեւանքով անզգուշությամբ էական վնաս է պատճառել անձանց եւ պետության օրինական շահերին՝ այդ կերպ ոտնահարելով քաղաքացիների սահմանադրական իրավունքներն ու հեղինակազրկելով իշխանության մարմիններին:
Հ. Տոնոյանին մեղադրանք է առաջադրվել ՀՀ քրեական օրենսգրքի 179 հոդվածի 3-րդ մասի 1-ին կետով («Յուրացնելը կամ վատնելը, որ կատարվել է առանձնապես խոշոր չափերով») եւ 315 հոդվածի 1-ին մասով(«Պաշտոնական անփութությունը»): Լոռու մարզի առաջին ատյանի դատարանում մինչ դատաքննությունը սկսվելը Հ. Տոնոյանը միջնորդել է դատական քննությունն անցկացնել արագացված կարգով՝ հայտարարելով, որ առաջադրված մեղադրանքն իրեն պարզ է, ինքը համաձայն է դրա հետ: Դատարանը Հ. Տոնոյանի պատասխանատվությունը եւ պատիժը մեղմացնող հանգամանքներ է համարել այն, որ նա նախկինում դատված չէ, բնութագրվում է դրականորեն, հանցագործությամբ պատճառված վնասը կամովին վերականգնել է:
Հուլիսի 11-ին Լոռու մարզի առաջին ատյանի դատարանի դատավոր Սուրեն Բաղդասարյանը վճռել է Հ. Տոնոյանին ՀՀ քրեական օրենսգրքի 179 հոդվածի 3-րդ մասի 1-ին կետով դատապարտել 5 տարի ազատազրկման, 315 հոդվածի 1-ին մասով՝ 300 հազար դրամ տուգանքի: Դատավճիռը մեկամսյա ժամկետում կարող է բողոքարկվել:
Կարդացեք նաև
Ոսկան ՍԱՐԳՍՅԱՆ
