Անցյալ ամռանը Սեւանա լճի շրջակայքում բացված հանրային լողափերում հանգստացող քաղաքացիները պարբերաբար զուգարանների եւ աղբահանության վերաբերյալ դժգոհություններ էին հայտնում: Այսօր «Հայացք» ակումբում հյուրընկալված բնապահպանության նախարարության աշխատակազմի ղեկավարի տեղակալ Աշոտ Ավալյանից Aravot.am-ը հետաքրքրվեց, թե այս տարի է՞լ են հանրային լողափերի զուգարանները կողպված լինելու եւ հանգստացողներն էլ անհանգստանալու աղբի հոտից: Պարոն Ավալյանը վստահեցրեց, որ այդ խնդիրները լուծվել են: Նա ասաց, որ աղբահանության մասով Սեւան ազգային պարկի հետ պայմանագիր ունեն եւ աղբը ժամանակին հեռացվում է, իսկ նախորդ տարվա բիո զուգարանները ստիպված են եղել փոխարինել սովորական զուգարաններով: Պարոն Ավալյանի մեկնաբանությունները` տեսանյութում.
Բնապահպանության պաշտոնյայի տվյալներով, տարեցտարի հանրային լողափերի հաճախորդներն ավելանում են. անցյալ տարի սեզոնին 120-130 հազար այցելու են ունեցել: Այս տարի ավելի շատ հաճախորդներ են ակնկալում:
Հարցին, թե հանրային լողափերը չեն՞ «խփում» մասնավոր լողափերի գործին, պարոն Ավալյանը պատասխանեց, որ հենց մասնավոր լողափերի հաճախորդների հաշվին էլ հանրային լողափերի այցելուների թիվն ավելանում է, թեեւ պարոն Ավալյանը չբացառեց, որ հանրայինի հաշվին մասնավորի գները կնվազեն. «Մասնավոր սեկտորի հետ մրցակցության խնդիր չի դրվել, եթե մասնավոր լողափերը ծառայություն են մատուցում բիզնես անելու համար, ապա մեր մասով, ընդամենը, սոցիալական խնդիր է, որ մարդիկ գնան այնտեղ հանգստանան, բայց, քանի որ մեր լողափերում մարդկանց թիվն ավելանում է, դա խոսում է այն մասին, որ նրանց հաճախորդների հաշվին է տեղի ունենում»:
Հանրային լողափերի սեզոնն արդեն 25 օր է բացված է: Այդ լողափերը նախատեսված են կարճատեւ հանգստի համար եւ ըստ Ա. Ավալյանի, կահավորված են լողափի համար անհրաժեշտ իրերով: Այս տարի որոշ հանրային լողափերում կլինեն նաեւ Սեւանի լճի ջրով լցված մանկական լողավազաններ: Հանրային լողափերը համագործակցում են փրկարար ծառայության հետ: Հանրային լողափերից օգտվելու կուլտուրան դեռեւս բավարար չէ. պարոն Ավալյանը նկատեց, որ այդքան էլ բարեխիղճ չեն գույքի նկատմամբ եւ հորդորեց ավելի ուշադիր լինել շրջակա միջավայրի նկատմամբ. «Հնարավոր չէ ամեն մեկ մետրի վրա տեսուչներ կանգնեցնել, որոնք արգելեն աղբ թափելը: Մեր հույսն այն է, որ մեր ժողովրդի գիտակցությունը բարձրանա»:
Կարդացեք նաև
Նախարարության մասնագետը ուսումնասիրել է եւ պարզել, որ հանրային լողափերում, հանգստացողների 10-15 %-ը տուրիստներ են:
Լուսինե ԲՈՒԴԱՂՅԱՆ
