Կենտրոն եւ Նորք-Մարաշ վարչական շրջանների ընդհանուր իրավասության դատարանից այսօր ստացել ենք հուլիսի 16-ի թվագրությամբ 24 էջից բաղկացած «Հայհիդրոէներգոնախագիծ» ՓԲ ընկերության գլխավոր տնօրեն Սենիկ Ջուլհակյանի հայցադիմումը վարույթ ընդունելու մասին դատարանի որոշումը, եւ հայցը Հայաստանի քաղաքագետների միության նախագահ Հմայակ Հովհաննիսյանի եւ մեր կայքի դեմ:
Պատվի, արժանապատվության, գործարար համբավն արատավորող արտահայտությունների համար հայցվորը պահանջում է ներողություն խնդրել, փոխհատուցում տրամադրել եւ հերքում հրապարակել:
Հայցը գտնվում է դատավոր Կարինե Պետրոսյանի վարույթում:
Սենիկ Ջուլհակյանը թեեւ վիճարկում է Aravot.am-ում հունիսի 10-ին տպագրված «Հմայակ Հովհաննիսյան.«Սուրեն Խաչատրյանը չլինելով մարզպետ, շարունակում է մնալ Սյունիքի ավազակապետ» վերնագրով հոդվածը, սակայն հայցադիմումում ոչ միայն չի նշել հոդվածի հրապարակման օրը, այլ տվյալ հրապարակման ենթավերնագիրն է դրել հայցապահանջի հիմքում. «Նա վստահեցնում է, որ Գորիսի դեպքերից հետո էլ Սուրեն Խաչատրյանը չի հրաժարվել Քաղաքագետների միության շենքը վերցնելու մտքից»:
Կարդացեք նաև
Ըստ հայցվորի վիրավորական արտահայտությունն այստեղ «Նա (Սենիկ Ջուլհակյանը) Սուրեն Խաչատրյանի փողերը լվացողն է» արտահայտությունն է:
Հայցվորը զրպարտչական է համարում մեր զրուցակցի՝ Հմայակ Հովհաննիսյանի «Սենիկ Ջուլհակյանն իր սեփական միջոցները չունի…», «Նա չի վճարել մի կանխավճար, որը պարտավոր էր վճարել Հայ համայնքների միության ֆորումի նախագահին: Նա խուսափել է վճարել 10 հազար եվրո կանխավճար», «Նա չուներ գրասենյակ, չուներ ոչինչ, ոչինչ չուներ..», «Իրականում նա ցանկանում էր այդ տարածքը զավթել ամեն գնով» արտահայտությունները:
Հայցվորի ներկայացուցիչն է Գեղամ Այվազյանը, որի հետ 25.06.2013-ին կնքվել է փաստաբանական ծառայություն մատուցելու վերաբերյալ պայմանագիր, եւ կողմը պարտավորվել է այդ հայցի շրջանակներում մատուցած ծառայությունների համար վճարել 200 000 ՀՀ դրամ գումար: Ի դեպ, այդ գումարը կողմը պահանջում է պատասխանողներից:
Հայցվոր Սենիկ Ջուլհակյանը դատարանից խնդրել է նաեւ , որպեսզի պարտավորեցնեն Հմայակ Հովհաննիսյանին ներողություն խնդրել իր կատարած արտահայտությունների համար:
Նա դատարան է ներկայացրել անգամ ներողության բովանդակությունը, որը ակնկալում է տպագրված տեսնել մեր լրատվամիջոցում:
Վիրավորանքը Սենիկ Ջուլհակյանը գնահատել է 280 000 ՀՀ դրամ, որպես փոխհատուցման գումար, իսկ զրպարտությունը՝ 320 000 ՀՀ դրամ:
Հայցվորը 20 000 ՀՀ դրամ էլ պետտուրքի գումար էր մուծել:
Դատական նախնական նիստի օրը դեռ չի նշանակված:
Ռուզան ՄԻՆԱՍՅԱՆ
Հ. Գ. Հրապարակում ենք ձայնագրությունն այն հարցազրույցի, որի համար Սենիկ Ջուլհակյանը դիմել է դատարան: «Առավոտը» միայն բարեխղճորեն վերարտադրել է նրա պնդումները:
[soundcloud url=”https://api.soundcloud.com/tracks/102410057″ iframe=”true” /]
ԱՌԱՎՈՏ, GOOD LUCK!!!