Օրերս «Ժառանգություն» կուսակցության առաջնորդ Րաֆֆի Հովհաննիսյանը կոչ արեց բոլոր իշխանական, ընդդիմադիր, այլընտրանք քաղաքական ու հասարակական ուժերին`սեպտեմբերի 21-ին, Հայաստանի անկախության 22-ամյա տարեդարձի օրը, նստել կլոր սեղանի շուրջ եւ համատեղ քննարկել Հայաստանի առջեւ ծառացած մարտահրավերներն ու դրանցից դուրս գալու տարբերակները: Aravot.am-ի հետ զրույցում պատասխանելով հարցին`իշխող ՀՀԿ-ն ականջալուր լինելո՞ւ է «Ժառանգության» առաջնորդի կոչին, ՀՀ ԱԺ փոխնախագահ Էդուարդ Շարմազանովն ասաց, որ ՀՀԿ-ն վերջին տարիներին բազմիցս բոլորին կառուցողական համագործակցության կոչ է արել:
Շարմազանովը հիշեցնում է, որ եւ ՀՀ նախագահը եւ քաղաքական մեծամասնությունը բացառապես երկխոսության կողմնակից են ու ոչ մեկ անգամ են հայտարարել այդ մասին. «Եթե որոշ քաղաքական գործիչներ փորձում են իրենց տեսնել փրկչի դերում, ապա պետք է ասեմ, որ փրկիչը եկել է ու համբարձվել է երկինք, երկրորդ փրկիչ չի լինելու»:
Ինչ վերաբերում է «համահայկական շարժման» միջոցով հեղափոխություն իրականացնելու Րաֆֆի Հովհաննիսյանի առաջարկին, մեր զրուցակիցը նկատեց. «Մեր ժողովուրդը արդեն հեղափոխություն իրականացրել է 1988 թվականին: Հիմա էվոլյուցիայի ժամանակն է, եւ մենք բոլորս պետք է գործենք երկրի շահերից ելնելով: Երկրում կան խնդիրներ, բայց այն կրախի առջեւ կանգնած չէ, այլ հակառակը՝ դանդաղ զարգանում է»:
Ըստ Շարմազանովի, իշխող ՀՀԿ-ն լավատեսորեն է տրամադրված`չնայած առկա դժվարություններին. «Նույնիսկ դժվարությունների մեջ մենք հնարավորություններ են տեսնում՝ ի տարբերություն հոռետեսների, որոնք նույնիսկ իրենց տրված հնարավորություններում դժվարություններ են տեսնում: Եթե պարոն Հովհաննիսյանը կարծում է, որ մենք արդեն ձախողման, կործանման եզրին ենք, ապա, ի տարբերություն իրեն, որ մեծ հոռետես է, ես լավատես եմ. իհարկե, կան բազմաթիվ խնդիրներ, բայց մենք դանդաղ առաջ ենք շարժվում և ոչ հետ»:
Կարդացեք նաև
Շարմազանովը Րաֆֆի Հովհաննիսյանին հորդորում է ետ նայել. «Հայաստանի ժողովրդավարությունը 10 տարի առաջ, 8 տարի առաջ, թեկուզ 5 տարի առաջ, խոսքի ազատության, բազմակարծության վիճակը, ընդդիմադիր գործիչների վիճակը, կոռուպցիայի դեմ պայքարը, իշխանության հրապարակայնությունը, և տեսնի` մենք առաջ ենք գնում, թե հետ ենք գնում»:
Նելլի ԳՐԻԳՈՐՅԱՆ
