Դա դժգոհության տեղիք է տալիս
Ռուսաստանից եւ այլ երկրներից իրենց ավտոմեքենաներով Հայաստան ժամանողները մեզ բողոքել են, որ իրենք ստիպված են Հայաստանի մուտքին ճանապարհավճար մուծել՝ մոտ 22 հազար դրամ: Նրանց խոսքերով՝ այլ երկրների սահմանը հատելիս նման վճար չի կիրառվում:
Երբ ավարտվում է այդ վճարով սահմանված Հայաստանում գտնվելու ժամկետը, իսկ Հայաստան այցելածն ինչ-ինչ պատճառներով ստիպված է լինում ավելի երկար մնալ մեր երկրում, նա հարկադրված է լինում իր ավտոմեքենայով կրկին ներկայանալ սահմանային անցակետ եւ ճանապարհավճարի լրացուցիչ մուծում կատարել: Արտերկրի մեր հայրենակիցները, արտասահմանից հյուրերը դժգոհում են, որ զբոսաշրջությունը, որպես տնտեսության գերակա ուղղություն հռչակած Հայաստանի կառավարությունը դրանով չի խթանում զբոսաշրջությունը:
Այս խնդրի առնչությամբ զանգահարեցինք Գուգարքի տարածաշրջանային մաքսատան Բագրատաշենի մաքսակետի պետ Կարեն Գրիգորյանին: Նա ասաց, որ կախված Հայաստան մտնող մեքենաների մակնիշից, Հայաստանում նրանց գտնվելու ժամկետից, ճանապարհավճարի գումարը տարբեր է; Մաքսակետի պետի խոսքերով՝ դա սահմանված է կառավարության որոշմամբ, որոշումն էլ փակցված է մաքսակետի պատին: Նա խորհուրդ տվեց մնացած հարցերով դիմել ՀՀ մաքսային ծառայության լրատվական ծառայություն:
Կարդացեք նաև
Ոսկան ՍԱՐԳՍՅԱՆ
