Մենք, իհարկե, ավելի շատ սովորել էինք, որ մեր կյանքը «մունդռողը» հիմնականում կառավարությունն է իր ախմախ որոշումներով, բայց մեր գործընկերների պնդումներն այն մասին, որ տրանսպորտի հետ կապված այս աղմուկն ավելի շուտ՝ հենց Բաղրամյան 26-ի ձեռքի գործն է, բավականին արժանահավատ են թվում։ Արժանահավատ այն առումով, որ վարչապետ Սարգսյանը, հաշվի առնելով այս պահի նրա խոցելիության աստիճանը, նույնիսկ չէր համարձակվի մտքով նման բան անցկացնել։ Բայց եւ չի բացառվում, որ սա նույնպես վարչապետի բստրածն է, սակայն իշխանությունը, հենց Բաղրամյան 26– ը, առերեւույթ իր վրա է վերցնում հարվածը, որպեսզի առաջին պլանում վարչապետը չերեւա եւ ավելի չգրգռի առանց այն էլ գրգռված հասարակությանը։
Իսկ տրանսպորտային այս «բունտը» խաղարկվում է մեկ հատուկ նպատակով՝ որպեսզի տեղի չունենա իսկական բունտը՝ պայմանավորված գազի, էլեկտրաէներգիայի եւ առաջին անհրաժեշտության մյուս ապրանքների սոսկալի թանկացումներով։ Ամենաբարձր լարվածությունն սպասվում է առաջիկա աշնանը եւ հատկապես ձմռան գալու հետ, երբ մարդիկ իրենց վրա կզգան նոր սակագների խժռող ազդեցությունը։ Տրանսպորտի 50 դրամը, թեեւ նկատելի, բայց ընդամենը թեթեւ ծախս է, եթե համեմատելու լինենք գազի, էլեկտրաէներգիայի սպառման եւ մյուս թանկացումների պատճառով վճարվելիք ավելորդ գումարների հետ։ Այլ խոսքով, տրանսպորտի թանկացումն ուտկա է՝ սոցիալ-տնտեսական օրակարգի բուն խնդիրներից հանրության ուշադրությունը շեղելու համար։
Այստեղ պետք է մի կարեւոր դիտարկում անել։ Եթե հանրությունը գլխիկոր ընդունի ուղեւորափոխադրումների այս ոչնչով չհիմնավորված թանկացումը, ապա այլեւս ոչ մի բարոյական իրավունք չի ունենա բողոքել մյուս թանկացումներից։ Մեր քաղաքական ուժերը պարտավոր են հասարակությանը հասկացնել այս նրբությունը եւ նրա հավաքական գիտակցությանը հասցնել այն ճշմարտությունը, որ հընթացս բոլոր թանկացումները մեկ նպատակ են հետապնդում՝ ժողովրդի հաշվին ապահովել օլիգարխիայի եւ պաշտոնյա-գործարարների նախկին բարձր եկամուտները, որոնք հանկարծ նվազել են գազի թանկացման արդյունքում։
Էդիկ ԱՆԴՐԵԱՍՅԱՆ
Կարդացեք նաև
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
Բա ընդիմադիր կուսակցությունները ուր են, թող գան ու առաջնորդեն, երիտասարդներին տանեն ճիշտ ուղղությամբ, դեպի Բաղրամյան 26: