Այսօր Կապանի քաղաքապետարանի նիստերի դահլիճում կայացավ «Դանդի փրիշս մեթալս Կապան» ՓԲԸ-ի կողմից «Ջինջ» ՍՊԸ-ին պատվիրված Գեղանուշի պոչատարի վթարային դատարկման ավազանի հոսքուղու աշխատանքային նախագծի վերաբերյալ հասարակական լսումը:
Ներկայացված նախագիծը նպատակ ունի բացառել վթարների ժամանակ Գեղանուշի պոչամբար տանող պոչատարից պոչանքների արտահոսքը դեպի շրջակա միջավայր եւ նվազեցնել շրջակա միջավայրին հասցվելիք վնասի ռիսկերը:
Նշենք, որ «Դանդի փրիշս մեթալս Կապան» ՓԲԸ-ի կողմից շահագործվող Գեղանուշի պոչամբարի պաչատարի վրա միայն վերջին մոտ մեկ տարում 3 վթար է տեղի ունեցել եւ պոչերի արտահոսք եղել դեպի շրջակա միջավայր:
Հանրային լսման ժամանակ պատվիրատու ընկերության եւ «Ջինջ» ՍՊԸ մասնագետները հանդիպման մասնակիցներին ներկայացրեցին նախագիծը: Տվյալ նախագծով մասնավորապես նախատեսված է կոմպենսատորների վրա նախագծել վթարի ժամանակ պոչանքի հավաքման մետաղական տաշտակներ, տեղափոխման հոսքուղիներ, կուտակման մետաղական տարաներ եւ ավազաններ, քանի որ մինչեւ այժմ եղած բոլոր վթարները տեղի են ունեցել բացառապես կոմպենսատորների հատվածում:
«Վթարի ժամանակ պոմպերի անջատումը եւ պոչատարերի դատարկումը պետք է իրականացվի ավտոմատ կառավարմամբ, իսկ վթարի պահից մինչեւ պոմպերի անջատումն ընկած ժամանակահատվածը չպետք է գերազանցի 2 րոպեն: Իսկ տարաներում կուտակված պոչանքները կտեղափոխվեն եւ կդատարկվեն պոչամբարում», – պարզաբանեցին նախագծի պատասխանատուները:
Հանրային լսման ներկաները դժգոհ էին նախագծի ներկայացումից եւ նշեցին, որ նախագծի հեղինակները կարող էին ավելի լավ պատրաստվել եւ այն ներկայացնել առավել հասկանալի ու ընդգրկուն, մինչդեռ անհասկանալի պահերը շատ էին, քանի որ ներկայացվող նյութը շատ սուղ տեսքով ու հակիրճ էր ներկայացվում:
Նախագիծը պետք է համապատասխան փորձաքննություն անցնի, իսկ շինաշխատանքների մեկնարկը կտրվի նոյեմբեր ամսին:
Մերի ՍՈՂՈՄՈՆՅԱՆ
