ՀԱԿ-ի տնտեսական հանձնաժողովը վերլուծելու է, թե ինչքան ֆինանսական միջոց պետք է մտներ պետական բյուջե, որը չի մտնում հենց այն պատճառով, որ այդ գումարներն, ըստ էության, թալանվում են՝ մինչեւ պետական բյուջե մտնելը: Այս մասին Aravot.am-ի հետ զրույցում ասաց ՀԱԿ խմբակցության ղեկավար Լեւոն Զուրաբյանը: Նրա խոսքերով՝ «Ինչքանով հետաքրքիր էին Վերահսկիչ պալատի բացահայտումները, թե ինչպես է թալանվում պետական բյուջեն, մեր գնահատականով՝ մի քանի անգամ ավելի շատ թալանվում է՝ մինչեւ պետբյուջե մտնելը: Մենք գնահատական ունենք, որը նախնական է, բայց հիմա աշխատում ենք, որ ավելի լուրջ հիմնավորումներ ստանանք եւ ավելի ճշգրիտ գնահատական տանք: Բայց մոտավորապես 2.5 մլրդ դոլար տարեկան ուղղակի չի մտնում բյուջե, թալանվում է՝ մինչեւ բյուջե մտնելը: Հիմա պատկերացրեք, որ այդ գումարներն օգտագործվեին՝ այլընտրանքային էներգետիկա ունենալու համար, տրվեին Երեւանի բյուջեին, որը թույլ կտար այս տրանսպորտային հարցերը կարգավորել: Բոլոր այս խնդիրները շատ հանգիստ կարելի էր կարգավորել, բայց 10 տարի զբաղվել են ուղղակի աննախադեպ չափերի հասնող թալանով, ուստի այսօր ունենք այն, ինչ ունենք»:
Մեր հարցին՝ կա՞ նախնական գնահատական, թե որ ոլորտներում է առավել մեծ չափերի հասնում թալանը՝ Լեւոն Զուրաբյանը պատասխանեց. «Դժվար է այդպես ասել, բայց հիմնականում դա կապված է այն ոլորտների հետ, որտեղ կան ապօրինի արտոնություններ, մաքսային, հարկային, մենաշնորհային..այդ ոլորտների հետ է կապված»:
Հռիփսիմե ՋԵԲԵՋՅԱՆ
