«Վրաստանի Հայ Համայնքի» Պատանեկան Միության շուրջ 50 մասնակից հուլիսի 20-ին ուղեւորվեց դեպի Հայաստան, որտեղ անցկացվելու է «Պատանեկան Միության» հնգօրյա ճամբար:
Միության հաղորդագրության համաձայն, ճամբարի ընթացքում ծրագրված են բազմաթիվ ժամանցային եւ կրթական միջոցառումներ: Երեխաները կայցելեն Գառնի, Գեղարդ, Էջմիածնի Մայր տաճար եւ թանգարան, Տաթեւի վանք, Սարդարապատ, Սեւանի լիճ եւ այլն: Երեխաների մի մասը առաջին անգամ կհայտնվեն իրենց պատմական հայրենքում:
«Խոսքերով չեմ կարող փոխանցել ուրախությունս: Առաջին անգամն է, որ լինելու եմ Հայաստանում: Շատ եմ լսել Հայաստանի մասին, գրքեր եմ կարդացել, ֆիլմեր դիտել… Համայնքում Հայաստանի մասին երգեր էինք սովորում… Իսկ այժմ մի քանի ժամից ես կտեսնեմ այն վայրը, որի մասին երգում էի ու երազում: Կտեսնեմ Արարատը.. Շատ ուրախ եմ», – «Միության» հետ զրույցում ասում է «Պատանեկան միության» անդամ Ալլան:
«Շատ ուրախ եմ, որ երեխաս ունի իր հայրենիքը տեսնելու հնարավորություն: Արդեն երկու ամիս է նա խոսում է ճամբարի մասին: Սպասում է անհամբեր… Ընտանիքի անդամներս վախենում ենք պատկերացնել, թե ինչքան կխոսի եւ կպատմի տուն վերադառնալուց հետո», – ասում է միության անդամներից մեկի մայրը՝ Մարինեն եւ ավելացնում. «Առաջին անգամ համայնք հաճախելուց անմիջապես հետո նա սկսեց երգել մեր ազգային երգերը, նրան նույնիսկ պարել են սովորացրել: Ընտանիքի անդամներս նրա հետ սկսել ենք սովորել հայոց պատմությունը»:
Կարդացեք նաև
«Համայնքի Պատանեկան Միությունն այսօր միավորում է 150-ից ավելի հայ պատանու: Երեխաների մեծամասը 14-16 տարեկան է: Շատ կարեւոր է, որ այս տարիքում երեխային զարգանալու համար ճիշտ ուղղություն տրվի, ինչպես ֆիզիկական, այնպես էլ մտավոր, բարոյա-էթիկական: Մեր ողջ գործունեությունը ուղղված է դեպի հայ երիտասարդների հոգեւոր եւ ֆիզիկական զարգացումը: Ճամբարը 2012-13թթ. եզրափակիչ միջոցառումն է: Ճամբարը լինելու է 5 օր` հուլիսի 20-24-ը», – ասաց «Վրաստանի Հայ Համայնք»-ի խորհրդի անդամ եւ «Պատանեկան Միության» ղեկավար Սլավա Մեժդոյանը:
