Գավառի Օրհուս կենտրոնը տեղեկացնում է, որ հուլիսի 18-ի երեկոյան 18:00-ի սահմաններում, Արգիճի գետի վերին հոսանքներում ՓՀԷԿ-ի խողովակները, չդիմանալով ջրի բարձր ճնշմանը, պայթել են եւ ողողել գյուղացիների ցանքատարածքները: Չնայած գյուղացիների բազմաթիվ հեռախոսազանգերին ու ՓՀԷԿ- ի աշխատակիցներին գտնելու փորձերին, ՓՀԷԿ-ի ներկայացուցիչներն այդպես էլ չեն ներկայացել ու ոչ էլ պատասխանել են հեռախոսազանգերին: Գյուղացիներն անելանելի վիճակում են:
Նրանք մտավախություն ունեն, որ վթարները կարող են կրկնվել առավել վտանգավոր տեղամասերում, որտեղ կարող են բնակելի տներ կամ շենքեր լինել: Գյուղացիները վստահ են, որ բնությունն է ընդվզում, քանի որ ՓՀԷԿ-ի գործարկման փորձերը մեկնարկել են առանց ջրօգտագործման թույլտվության՝ հաշվի չի առնվել, որ սա Արգիճի գետն է ու «ջուրն իր ճամփան կգտնի»:
