«Հայաստանում կա հարյուր քսան թանգարան, որոնցից երեսուն-քառասունը մայրաքաղաքում, մյուսները մարզերում: Ազգային պատկերասրահում 2010թ.-ից սոցիոլոգիական հետազոտություններ անցկացնելով երեք ուղղությամբ, հետազոտել ենք, թե մեր ցուցահանդեսների այցելությունները, մեր թանգարանների այցելուներին, ինչպես նաեւ հարցումներ ենք անցկացրել դրսում: Հարցումների արդյունքում ամենից շատ այցելություն գրանցած առաջին հինգ թանգարանները եղել են Հայաստանի ազգային պատկերասրահը, Թումանյանի թանգարանը, Էրեբունի պատմահնագիտական արգելոցը, Մատենադարանը եւ Փարաջանովի թանգարանը»,-այսօր այս մասին «Զարկերակ» մամուլի ակումբում ասաց ԻԿՕՄ-Հայաստան ազգային կոմիտեի տնօրեն Անի Ավագյանը:
Նրա խոսքով` մեր մշակույթով հետաքրքրված են եվրոպացիները, որոնք այցելում են Մատենադարան, Պատմության եւ Փարաջանովի թանգարաններ, ինչպես նաեւ Գառնու տաճար:
Ըստ Ավագյանի` մենք ունենք մշակութային ժառանգություններ, որոնք «բրենդային» են, օրինակ ձեռագրերը: «Մեր թանգարանները պատկանում են տարբեր գերատեսչությունների եւ մեր կողմից ստեղծվող տեղեկագրքում համատեղվելու են բոլոր տիպի թանգարանները, տեղեկագիրքը հավանաբար լույս կտեսնի հաջորդ տարի»,-ասաց նա, հավելելով, որ ի տարբերություն մեր հարեւանների, մեր շատ թանգարաններ չունեն անգամ բուկլետներ:
Ավագյանի խոսքով` խնդիրներ շատ կան սկսած շենքային պայմաններից մինչեւ աշխատակազմ, սակայն աշխատանքներ, քննարկումներ տարվում են. «Առհասարակ խնդիրները շատ-շատ են: Մենք աշխատում ենք Մշակույթի նախարարության հետ, քանի որ թանգարանների վերաբերյալ չկա օրենք: Եթե ես գնում եմ արտերկիր սեմինարների, ես ոչինչ չունեմ ինձ հետ տանելու, ցույց տալու, ինչ էլ, որ կա մասնավոր են, մինչդեռ մեր հարեւանները պետական մակարդակով յուրացնում են այն ամենը, ինչ մեր նախնիներից մեզ է փոխանցվել»,-ասաց նա:
Կարդացեք նաև
Քրիստինա ՄԻՐԶՈՅԱՆ
