Ուկրաինացի պարապլաներիստներ Անտոն Բալիչկին եւ Ալեքսանդրա Բալիչկայան «Ֆորում» մամուլի ակումբում կայացած մամուլի ասուլիսում պարապլանային սպորտը եւ պարատուրիզմը Հայաստանում զարգացնելուն խոչընդոտող երկու հիմնական խնդիր արձանագրեցին:
«Հայաստանը պարապլանային սպորտի եւ պարատուրիզմի համաշխարհային կենտրոն դարձնելն անհնար է, քանի որ կան երկրներ, որոնք այս հարցում վաղուց արդեն կայացած են, իսկ Հայաստանում չկան ենթակառուցվածքներ: Տուրիստներին այստեղ ո՞ւր տանես: Պարատուրիստը սովորական տուրիստից տարբերվում է միայն նրանով, որ նա գալիս է ուսապարկով: Այսինքն, նա էլ պիտի սպասարկվի այնպես, ինչպես ամեն տեղ բոլոր տուրիստներին են սպասարկում: Հայաստանում տուրիզմը զարգացնելուն ի՞նչն է խանգարում: Նախ, ինքնաթիռի չափից ավելի թանկ տոմսերը: Օրինակ, մեզ գրում են, որ ցանկանում են գալ Հայաստան, տեսնել ձեր երկիրը, ճախրել Հայաստանի երկնքում: Բայց չեն գալիս, որովհետեւ ինքնաթիռի տոմսը շատ թանկ է: Մարդիկ չեն կարող, կամ չեն ցանկանում մեկ տոմսի համար 400-500 եվրո վճարել: Ասում են, որ այդ գումարով ավելի լավ է` գնան Մարոկկո:
Երկրորդ հիմնական պատճառը, որքան էլ զարմանալի է, հյուրանոցներում թանկ օրավարձն է: Ավելի հասկանալի լինելու համար բերենք մեկ օրինակ: Մակեդոնիայում մեկ պարատուրիստի օրավարձը թռիչքի վայրին մոտ գտնվող հյուրանոցում 5-6 եվրո է` նորմալ սենյակներ, նորմալ սնունդ: Իսկ Հայաստանում 12 եվրոյից պակաս հյուրանոցային համար դժվար թե գտնես: Եթե ինքնաթիռի տոմսերի արժեքը լինի 250 եվրոյի սահմաններում եւ հյուրանոցներում էլ նորմալ գներ սահմանվեն, հավատացնում ենք, որ Ուկրաինայից, Մոսկվայից ու այլ երկրներից հոսքը անհամեմատ կավելանա», – նշեցին հյուրերը:
Աշոտ ՀԱԿՈԲՅԱՆ
Կարդացեք նաև
