«Նախաքննությունը գրեթե հրապարակային է ընթանում, բայց այստեղ շատ կարեւոր է պաշտոնական կողմը. զինդատախազ Կոստանյանն ի սկզբանե միակողմանի հայտարարություններ է անում, որոնք ուղղված են տուժող կողմի դեմ»,- այսօր «Ուրբաթ» մամուլի ակումբում հրավիրված մամուլի ասուլիսում խոսելով Սյունիքի նախկին մարզպետ Սուրիկ Խաչատրյանի տան մոտ տեղի ունեցած ողբերգական ելքով իրադարձությունների մասին, ասաց «Լրագրողները հանուն մարդու իրավունքների» կազմակերպութան ղեկավար Ժաննա Ալեքսանյանը:
Ըստ բանախոսի, տուժող կողմի նկատմամբ անարդարությունը զինդատախազության գործելաոճն է ընդհանրապես: Այս եզրահանգմանը տիկին Ալեքսանյանը հանգել է իրենց կազմակերպության շրջանակներում մի շարք դեպքերով իրականացրած մշտադիտարկումների արդյունքում:
Ժաննա Ալեքսանյանը ուշադրություն է հրավիրում այն փաստին, որ զինդատախազ Գեւորգ Կոստանյանի հայտարարությունները ամբողջությամբ համընկնում են Սուրիկ Խաչատրյանի հայտարարությունների հետ: «Համակարգը պաշտպանում է զինդատախազին»,- եզրակացրեց բանախոսը`նկատի ունենալով նաեւ նախորդ օրը «Ազատություն» ռադիոկայանին տված արդարադատության նախարար Հրայր Թովմասյանի հարցազրույցը, որն ասել էր, թե Կոստանյանն ասում է այն, ինչը պետք է ասի: «Այս աղմկահարույց գործը, որի քննության ամբողջ ընթացքը շատ կարեւոր է, պիտի անաչառ լինի»,- ասաց բանախոսը:
Նելլի ԳՐԻԳՈՐՅԱՆ
