«Միջոցառումը օրենքի նախագծի հանրային քննարկում է, այն ենթադրում է ժողովրդավարական կառավարում, այսինքն` հանրային մասնակցային կառավարում»,-այսօր «Սոցիալական աջակցության մասին» ՀՀ օրենքի նախագծի հանրային քննարկման մասին Aravot.am-ի հետ զրույցում նշեց «Արազա» ԲՀԿ նախագահ Թամարա Աբրահամյանը:
Նրա խոսքով այսպիսի քննարկումները այն հնարավոր գործիքներն են, որոնք մասնակցային կառավարումը որոշումների ընդունման փուլում դարձնում են հնարավոր, ակտուալ եւ գործնական.
«Օրենքի մշակման փուլում անհրաժեշտ է ներգրավվել հասարակությանը, օրենքի սուբյեկտները պարտադիր պետք է մասնակցեն օրենքների ընդունմանը, դա միջազգային նորմ է: Մեր երկրում կան բազմաթիվ օրենքն ամրագրող իրավական ակտեր, բայց կիրառման մակարդակում մենք դեռ սկսնակ փուլի մեջ ենք»:
Քննարկման հիմանական նպատակն է բարձրացնել օրենքի նախագծում փոփոխության հիմնական նպատակներին առնչվող իրավական հիմքերի բացերի մասին հետեւյալ հարցերի շուրջ.
Կարդացեք նաև
. խնամակալների հիմնախնդիրների վերլուծության, պետության կողմից աջակցության, Հաշմանդամների տեղեկանքներ՝ Մեկ պատուհանի սպասարկման,
. ծառայությունների մասնագիտացման բարելավման եւ երկրում իրական սոցիալական աշխատանքի ծառայությունների հիմնման,
. անաշխատունակության վճարներից հարկեր գանձման,
. ինտեգրված սոցիալական համակարգի ներդրման շրջանակներում լիազոր մարմնի համապատասխան վարչությունների, գերտեսչությունների եւ նրանց միջեւ փոխգործակցության մեխանիզմների,
. ոլորտի կարգավորող օրենքների անհամապատասխանության հիմնախնդիրների
Տիկին Աբրահամյանի պնդմամբ, քննարկումն անմիջական, ուղղակի եւ շատ ավելի ակտիվ ձեւն է, նրանք աշխատել են թիրախավորված լսարան ունենալ: Բարձրացրած 5 ուղղությունները տարիներ շարունակ օրակարգում են եւ կառավարության տարբեր որոշումներով ամրագրված են:
ՀՀ Աշխատանքի եւ սոցիալական հարցերի նախարարության սոցիալական աջակցության վարչության պետ Աստղիկ Մինասյանի համոզմամբ, գործող սոցիալական պաշտպանության համակարգում կան մարմիններ, որոնք իրականացնում են տարբեր սոցիալական կարիք ունեցող անձանց նկատմամբ պաշտպանություն, օգնություն: Ընտանիքում կարող են լինել աջակցության կարիք ունեցող անձինք, թոշակառուներ, հաշմանդամներ, գործազուրկներ՝ սեփական խնդիրները լուծելու համար անհրաժեշտ է միջոցներ կիրառել: Այս ուղղությամբ տարված աշխատանքները սկսել են 2010 թ.ից.
«Դրամական օգնությունն ու սոցիալական ծառայությունը պետք է տարանջատել, հզորացնել սոցիալական աշխատողի դերը, ինքնուրույնություն տալով սոցիալական աշխատանքին»:
Անժելա ՇԱՀՈՒՄՅԱՆ
