Այսօր Aravot.am-ը զրուցեց ՌԴ-ում 18 մարդու մահվան պատճառ դարձած հայ վարորդի՝ Հրաչյա Հարությունյանի հարազատների հետ: Վարորդի ընտանիքին օգնելու համար բացվել է հատուկ հաշվեհամար եւ արդեն տարբեր տրամաչափի պաշտոնյաներ հայտարարում են, որ օգնելու են եւ հաշվեհամարին գումար են փոխանցելու:
Մենք հետաքրքրվեցինք, թե արդեն հաշվեհամարին որքան գումար է հավաքվել: Հրաչյա Հարությունյանի աղջիկը՝ Լիլիթն ասաց, որ հստակ գումարի չափը չգիտի:
Հրաչյա Հարությունյանի կինը, քույրը նույնպես չգիտեին հավաքված գումարի չափը: Նրանք տեղյակ էլ չէին, որ ՀՀԿ խմբակցության քարտուղար Հովհաննես Սահակյանը պատրաստվում է Հրաչյայի կնոջ՝ Անահիտի՝ ՌԴ տեղափոխման ծախսն իր վրա վերցնել: Հովհաննես Սահակյանը Panorama.am-ին ասել էր, որ եթե դրա անհրաժեշտությունը կա, ու եթե դա կարող է որեւէ կերպ օգնել Հրաչյա Հարությունյանին ու նրա ընտանիքին, ապա ինքը պատրաստ է իր հնարավորություների շրջանակներում վերցնել այդ խնդրի լուծումն իր վրա:
Տիկին Անահիտն ասաց, որ գուցե հաշվեհամարին արդեն գումարը փոխանցվել է, բայց իրենք չգիտեն, թե ուղարկողն ով է: Աղջկա՝ Լիլիթի խոսքերով՝ Հովհաննես Սահակյանը համենայնդեպս իրենց հետ չի կապվել եւ առձեռն որեւէ գումար չի փոխանցել:
Կարդացեք նաև
Մենք հետաքրքրվեցինք՝ այն, որ Հրաչյա Հարությունյանն իր մեղավորությունը չի ընդունել եւ հրաժարվել է պատասխանել հարցերին, դա փաստաբանի՞ խորհուրդն էր՝ Լիլիթը չկարողացավ պատասխանել: Հարազատներին հաջողվել է այսօր միայն ճշտել, որ Հրաչյան արդեն լավ է, նրան հագուստ են տվել եւ ուտելիք. «Մեզ այդպես են ասել: Հենց Հրաչյայի հետ մենք չենք կարողանում խոսել»,- փոխանցեց կինը:
Ի դեպ, տեղեկություններ կան, որ Հրաչյան բազմաթիվ կոտրվածքներ ունի, կրծքավանդակի սալջարդ, ոտքի կոտրվածք: Հրաչյա Հարությունյանի կինը մեզ հետ զրույցում այս առնչությամբ այլ տեղեկություն հաղորդեց: Նրանք էլ իմացել են, որ Հրաչյան արմունկի կոտրվածք ունի, կողոսկրի ջարդվածք. «Հեռուստացույցով ենք լսել: Մենք ոչ մի բան չգիտենք, եթե մենք իր հետ չենք խոսացել, որտեցի՞ց պիտի հաստատվի կամ հերքվի այդ տեղեկությունը»,- ասաց կինը:
Հռիփսիմե ՋԵԲԵՋՅԱՆ
“18 մարդու մահվան պատճառ դարձած հայ վարորդ”? Ինչով էք դուք տարբերվում ռուս կողմնակալ լրագրողներից? Գոյություն ունի “անմեղության վարկած” հասկացությունն, ըստ որի Հրաչյան կարող է մեղավոր ճանաչվել միայն օրինական ուժի մեջ մտած դատավճռով։