Խոսքի ազատության պաշտպանության կոմիտեն իր 2013 թվականի երկրորդ եռամսյակային զեկուցում, որը վերաբերվում է Հայաստանում խոսքի ազատության վիճակի եւ լրագրողների ու ԶԼՄ-ների իրավունքների խախտումներին, ներառել է նաեւ «Freedom House» միջազգային իրավապաշտպան կազմակերպության 2012թ տարեկան զեկույցը, որում անդրադարձ կա Հայաստանում խոսքի ազատությանը:
«Freedom House» -ն անդրադառնալով աշխարհում խոսքի ազատությանը, նշել է, որ ԶԼՄ-ները գնահատվել են 1-100 միավոր ընդգրկող սանդղակով, ըստ հետեւյալ խմբերի՝ ազատ (1-30 միավոր), մասամբ ազատ (31-60միավոր), անազատ (61-100 միավոր), այսինքն` որքան քիչ են միավորները, այնքան բարձր է ազատ լինելու մակարդակը: Գնահատականները տրվել են երեք չափանիշով. հաշվի են առնվել օրենսդրական, քաղաքական եւ տնտեսական միջավայրերը, որոնցում գործում են ԶԼՄ-ները: Արդյունքների գումարի հիման վրա ձեւավորվել է վարկանիշային սանդղակ՝ ուսումնասիրված 197 երկրի համար: Պարզվել է, որ դրանցից 63-ում՝ ԶԼՄ-ները համարվել են ազատ, 70-ում՝ մասամբ ազատ եւ 64-ում՝ անազատ:
Խոսքի ազատության պաշտպանության կոմիտեն նշում է, որ ըստ այս հետազոտության արդյունքների՝ 2012 թվականին հայաստանյան ԶԼՄ-ները գնահատվել են որպես անազատ, ինչպես եւ նախկինում, թեեւ վարկանիշային միավորը 61 է եղել 2010 եւ 2011 թվականների 65-ի փոխարեն:
Նշվում է նաեւ, որ իրավիճակի փոփոխությունը, կազմակերպության կարծիքով, պայմանավորված է եղել նրանով, որ խորհրդարանական ընտրությունների լուսաբանումն ավելի հավասարակշռված է եղել՝ նախորդ տարիների ընտրարշավների համեմատ, ինչպես նաեւ ավելի քիչ են եղել ճնշումներն ու բռնությունները լրագրողների նկատմամբ:
Կարդացեք նաև
Ըստ «Freedom House»-ի զեկույցի՝ ընդդիմադիր կուսակցությունները այս քարոզարշավի ընթացքում մեծապես օգտագործել են առցանց լրատվամիջոցները, իսկ նախորդ տարվա համեմատ՝ նկատելիորեն կրճատվել են վիրավորանքի եւ զրպարտության գործերը՝ ԶԼՄ-ների ներգրավվածությամբ:
Պատրաստեց՝ Եվա ՀԱԿՈԲՅԱՆԸ
