«Վաղ թե ուշ, իրենք պետք է հասկանան, որ իրենց գործունեությունն օրինական չէ: Մենք եւս մեկ անգամ իրենց տվեցինք այդ հնարավորությունը՝ շտկելու այն իրավիճակը, որն այսօր տեղի է ունենում Հայաստանի Հանրապետությունում: Մենք պարտավոր էինք դա անել, իրենք պարտավոր էին գործել օրենքով սահմանված կարգով»,- Aravot.am-ի հետ զրույցում ասաց «Ժառանգություն» կուսակցության վարչության անդամ Զարուհի Փոստանջյանը: Խոսքը ՍԴ-ի կողմից օրերս կարճված դիմումի մասին է, որի հեղինակը նախագահի նախկին թեկնածու Րաֆֆի Հովհաննիսյանն էր :
Տիկին Փոստանջյանից հետաքրքրվեցինք՝ ի՞նչ ակնկալիքներ կային ՍԴ-ից, որը քողարկել է ՀՀ բոլոր ընտրությունները: «Մենք պարտավոր ենք այս գործընթացներով անցնել: Մեր ակնկալիքն այն է, որ մենք, որպես հասարակություն, չպետք է հանդուրժենք նման գործելակերպը, որպեսզի այդ մարդիկ, ովքեր տվյալ պահին նաեւ ամենի պատասխանատուներ են, ապագայում նաեւ չկարողանան արդարացնել իրենց գործունեությունը, որպեսզի չասեն՝ չեն դիմել, որոշում չենք կայացրել: Մենք դիմել ենք, դուք որոշում եք կայացրել: Սա այն ճանապարհն է, որով մենք պետք է անցնեինք»,- ասաց մեր զրուցակիցը՝ հավելելով, որ եթե իրենց բողոքը քննարկման առարկա դառնար, ապա պետք է որոշում կայացվեր հօգուտ դիմողի: Իսկ դա կնշանակեր, որ ընտրությունները տեղի չեն ունեցել ՀՀ-ի օրենքով սահմանված կարգով եւ ՀՀ օրենքների համապատասխան:
Ի դեպ, ՍԴ-ի՝ Րաֆֆի Հովհաննիսյանի դիմումը կարճելու քայլին Զարուհի Փոստանջյանը պատասխանել է հայտարարությամբ, որում մասնավորաբար ասվում է. «2013 թվականի հուլիսի 16-ին ՀՀ Սահմանադրական դատարանը Գագիկ Հարությունյանի նախագահությամբ ևս մեկ անգամ փաստեց իր մեղսակցությունը եռապետերի կողմից հայ ժողովրդի իշխանությունը գողությամբ, կողոպուտով և ավազակությամբ հափշտակելու հանցագործության մեջ` հայտարարելով, որ Սերժ Սարգսյանի կողմից 2013 թվականի նախագահական ընտրությունների նախընտրական քարոզարշավի համար օրենքով սահմանված 100.000.000. դրամ գումարի եռակի գերազանցումը չի խախտում ՀՀ Սահմանադրությունը: Հայ հասարակությունը իր 20-ամյա նորանկախ պետության ձախողման համար պատասխանատվության է կանչելու մեղավոր անձանց: Անշուշտ, գլխավոր մեղավորները երեք նախագահություններն են, սակայն ես այսօր պետք է անդրադառնամ հայ ժողովրդի նորագույն պատմության աղետի գլխավոր մեղսակիցներից ևս մեկին` ՀՀ Սահմանադրական դատարանի նախագահ Գագիկ Հարությունյանին»:
Տիկին Փոստանջյանը նկատում է, որ Գագիկ Հարությունյանի «անմիջական կատարմամբ և հովանու ներքո» 1996 թվականից առայսօր «սահմանադրական արդարադատության» անվան տակ պարտակվել է հայ ժողովրդի դեմ գործված մեծագույն հանցագործությունը`Հայաստանի Հանրապետության մեկ ու կես միլիոն քաղաքացու և նրանցից օտար երկրներում ծնված հարյուր հազարավոր հայ երեխաների հայրենազրկումը, միլիոնավոր հայերի` դեպի Հայրենիք ազգահավաքի գաղափարը կյանքի կոչելու հավատազրկումը:
Կարդացեք նաև
«2013 թվականի նախագահական ընտրություններից հետո Հայաստանի Հանրապետության քաղաքացիների կողմից նախագահ ընտրված Րաֆֆի Հովհաննիսյանի` ՀՀ Սահմանադրական դատարան ներկայացրած դիմումներով արդարադատության իրականացման մերժումը ոչ միայն լրջագույն սպառնալիք է այս պահին մեր երկրում ապրելու իրավունքին, այլ նաև փորձ է հավատազրկել աշխարհասփյուռ հայերին իրենց հայրենիքում համախմբվելու և ապրելու կարևորագույն առաքելությունից:Հանցագործներին հովանավորելու բազմամյա փորձ ունեցող Գագիկ Հարությունյանի այն հայտարարությունը, թե որևէ երկրի Սահմանադրական դատարան երբևէ անվավեր չի ճանաչել ընտրությունների արդյունքները, ոչ միայն ծաղր է իրավունքի գերակայության նկատմամբ, այլ նաև ուղղակի ապտակ՝ մեր արժանապատվությանը: Համանման կերպով էին նաև «հիմնավորում» Օսմանյան կայսրությունում ցեղասպան եռապետերը Հայոց ցեղասպանությունը և հայրենազրկումը շղարշելու իրենց ցանկությունը` առաջին համաշխարհային պատերազմում հայերին անվտանգ տարածքներ տեղափոխելու գործողությունը…»,- ասված է պատգամավորի հայտարարության մեջ՝ հավելելով. «Ազատության հրապարակը պարտադրում է ոչ միայն ազատություն, այլ նաև արդարադատություն: Ձեր և Ձեր հանցակիցների նկատմամբ անխուսափելի է արդարադատության իրագործումը Ազատության հրապարակում` ժողովրդի իրավազորությամբ:Սպասեք այդ օրվան»:
Նելլի ԳՐԻԳՈՐՅԱՆ
