«Մինչ քաղաքականությամբ զբաղվելը ես իմ անձնական բիզնեսն ունի, բայց երբ մուտք գործեցի քաղաքականություն, միանգամից դուրս եկա այդ բնագավառից: Կարծում եմ, որ պետական պաշտոնյան, քաղաքական գործիչը չպետք է միաժամանակ զբաղվի բիզնեսով և քաղաքականությամբ»,-Aravot.am-ի հարցին` արդյոք ընդունելի՞ է այն, որ քաղաքական գործիչները, պատգամավորները ներգրավված են բիզնես գործունեության մեջ, այսպիսի կարծիք հայտնեց Նոր Հարավային Ուելս նահանգի խորհրդարանի պատգամավոր, Հայաստան-Ավստրալիա բարեկամական հանձնախմբի նախագահ Ջոնաթան Օդեյը:
Նա պատմեց, որ իր ընկերներից շատերը չթողեցին բիզնես գործունեությունը, քանի որ սկզբունքորեն այլ դիրքորոշում ունեին: Սակայն ըստ ավստրալացի պատգամավորի` գալիս է մի պահ, երբ միաժամանակ բիզնես ոլորտում և քաղաքականության մեջ ներգրավվելու դեպքում առաջանում է շահերի բախում:
Հետաքրքրվեցինք` Ավստրալիայի օրենսդրությամբ թույլատրվո՞ւմ է պատգամավորին զբաղվել բիզնես գործունեությամբ: Ջ. Օդեյը պատասխանեց. « Այդ առումով արգելքներ չկան: Դա հնարավոր է, եթե, իհարկե, այդ գործունեությունը հակասության մեջ չի մտնում ազգային օրենսդրության հետ: Մեր երկրի պրակտիկան ցույց է տալիս, որ այն մարդիկ, ովքեր զբաղեցնում են պետական պաշտոններ, կամ հիմնականում չեն զբաղվում գործարարությամբ, կամ կտրականապես դեմ են այդ գործունեությունը գուգահեռել քաղաքականությանը: Պատճառն այն է, որ քաղաքականությամբ և բիզնես գործունեությամբ զբաղվելու պարագայում կարող են առաջանալ պոտենցիալ խնդիրներ կոռուպցիայի, շահերի բախման և այլ ռիսկային հարցերի հետ կապված»:
Կարդացեք նաև
Տաթև ՀԱՐՈՒԹՅՈՒՆՅԱՆ
