Հայաստանի սպառողների ազգային ասոցիացիան, Սպառողների միությունն ու Իրազեկ եւ պաշտպանված սպառող հ/կ-ն որոշել են համախմբվել եւ ստեղծել այն խումբը, որը եւս մեկ անգամ կփորձի խորությամբ ուսումնասիրել սննդի վիճակը, բացահայտել վտանգների պոտենցիալ տեղերը, մասշտաբային փորձաքննել սնունդը: Այսօր «Տեսակետ» մամուլի ակումբում այդ մասին խոսեցին Հայաստանի սպառողների ազգային ասոցիացիայի նախագահ Մելիտա Հակոբյանն ու Սպառողների միության նախագահ Արմեն Պողոսյանը:
Խոսելով Հայաստանում սննդի հետ կապված խնդիրների մասին` Արմեն Պողոսյանն ասաց, որ սննդի վիճակն այնքան տագնապալի չէ, ինչքան ներկայացվում է մամուլում, սակայն չլուծված խնդիրներ, այնուամենայնիվ, կան:
«Մեր շփումները լաբորատորիաների հետ միշտ ցույց են տալիս, որ սննդի հետ կապված առաջնահերթ խնդիրը մանրէաբանությունն է: Պետք է լինի սննդի իդեալական վիճակ եւ ոչ միայն սննդի, այլ նաեւ տվյալ արտադրամասի պատուհանների, պատերի, հատակի: Սա մեզ մոտ կաղում է: Իսկ եթե չկա այդ ստերիլ վիճակը, ապա հավանականությունը մեծ է, որ մանրէները կթափանցեն սննդի մեջ: Հաջորդը հավելումների խնդիրն է: Գոյություն ունի թույլատրված եւ արգելված ցանկ, որտեղ շատ ու շատ շռայլումներ կան: Մյուս թերությունները վերաբերում են պիտակավորմանը: Մեզ մոլորության մեջ են գցում, մեզ խաբում են բառի ուղիղ, իսկական իմաստով: Դա վերաբերում է ժամկետներին: Եթե անգամ ժամկետները նշված են, էլի վստահություն չկա: Պատահել են դեպքեր, որ այդօրվա ձվերի վրա նշված են եղել վաղը չէ մյուս օրվա ամսաթվերը»:
Նա նշեց, որ թեեւ պիտակավորման հետ կապված առաջընթաց կա, բայց դեռ շատ անլուծելի հարցեր են մնում. «Եթե այդ ցուցանիշները կան, բայց չեն ընթերցվում, կամ երկիմաստ են, դրանք չլինելու հավասար են: Առայժմ մեր օրենքը պատժում է ժամկետների բացակայության կամ սխալ տեղեկության համար, իսկ վատ ընթեռնելիության համար չկա պատիժ, սակայն կարծում եմ, որ շուտով կունենանք այդ խստությունը»:
Կարդացեք նաև
Իսկ Մելիտա Հակոբյանն ասաց, որ իրենք միավորվել են, որպեսզի անեն ավելին, քան նախկինում են արել. «Մենք եկանք այն համոզման, որ իրար հետ ավելի ուժեղ կլինենք եւ ավելի ճիշտ կաշխատենք»: Ըստ նրա, իրենց հիմնական նպատակը քաղաքացիական հասարակություն ստեղծելն է. «Մենք ուզում ենք մեր քաղաքացուն դարձնել կիրթ եւ իրազեկ սպառող: Այսպիսի ասացվածք կա` «Գեղ կանգնի՝ գերան կկոտրի», այսինքն, եթե մարդն ինքն արդեն պահանջատեր դառնա, գիտակցի իր շահը եւ իր իրավունքը պաշտպանի, բոլորը կզգաստանան: Ես միշտ ասել եմ ու կասեմ, որ ամենահարուստ օլիգարխն, անգամ, կարող է սնանկանալ` սպառողի` մի փոքր իր շահերը պաշտպանելու պատճառով: Եթե նա ասի, «գիտե՞ք ինչ կա, այս ապրանքն ունի թերություններ, եւ մենք չպետք է այն գնենք», ամեն ինչ լավ կլինի: Այսինքն, մեր երեք կազմակերպությունների խնդիրն է ի հայտ բերել այն գործոնները, որոնք կարող են ազդել մարդու առողջության վրա, ինչպես նաեւ լայնամասշտաբ ձեւով բացատրել ժողովրդին, արթնացնել նրանց հետաքրքրությունը, որպեսզի նրանք կարողանան, իրոք, պայքարել»:
Անի ՔԵՇԻՇՅԱՆ
