«Երթուղային տաքսիների գների բարձրացումն անխուսափելի է: Սակայն, արդյոք մենք կարո՞ղ ենք ակնկալել, որ գների թանկացման հետ մեկտեղ, որակը մի փոքր կբարձրանա»,- այս մասին այսօր «Հենարան» ակումբում լրագրողների հետ հանդիպման ժամանակ ասաց «Քաղաքացիական դիրքորոշում» հ/կ նախագահ Գեւորգ Դոստուրյանը:
Պարոն Դոստուրյանն առաջ քաշեց մի քանի խնդիրներ. «Երթուղային տաքսիների վարորդները շատ հաճախ կանգառից դուրս ուղեւոր են վերցնում, չեն անցնում բուժզննում, իսկ մեքենաները` տեխզննում: Տաքսիների դեպքում խնդիրը գրեթե նույնն է, այն բացառությամբ, որ ներկայումս անօրինական տաքսիների թիվը հետզհետե ավելանում է»: Պարոն Դոստուրյանը նշեց նաեւ «պլան» հասկացության վերացման անհրաժեշտությունը. «Վարորդները պայմանագրեր ունեն, որտեղ նշված է նաեւ աշխատավարձը: Սակայն վարորդները չեն ստանում աշխատավարձ: Նրանք պլանն են վճարում, իսկ մնացած գումարը արդեն իրենց է մնում: Եթե վարորդը աշխատավարձ ստանա, ապա նա այլեւս շահագրգռված չի լինի կանգառից դուրս ուղևոր որսալ եւ մի քանի ժամ ավելի աշխատել, ինչը անվտանգության բացակայության պատճառ է դառնում»:
Անդրադառնալով բուժզննման եւ տեխզննման խնդիրներին` պարոն Դոստուրյանը նշեց, որ այժմ դրանք ձեւական բնույթ են կրում, իսկ խնդիրը հնարավոր է լուծել վերահսկողության միջոցով. «Հարցի լուծումը վերահսկողությունն է: Տվյալ դեպքում տեսչությունը պետք է բարեխիղճ աշխատի, ինչպես աշխատեց ոստիկանությունը: Ոստիկանության վերահսկողության շնորհիվ` այսօր վարորդների 70-80%-ը ամրագոտի է կապում: Վարորդներին պետք է ստիպել, որ նրանք բուժզննում անցնեն, ինչը բյուջեից հավելյալ ծախսեր չի պահանջում»:
Լուսինե ՇԱԽԱԶԻԶՅԱՆ
