Շիրակի մարզի ընդհանուր իրավասության դատարանում Գյումրիի նախկին քաղաքապետ Վարդան Ղուկասյանի դստեր նշանածի` Կարեն Եսայանի սպանության գործով դատական նախորդ նիստի ժամանակ Վարդան Ղուկասյանը վիրավորանքներ էր հնչեցրել, ներկաների հանդեպ անհարգալից էր եղել եւ փաստաբանին կոչել «դեւ»՝ ասելով, որ չի պատասխանի նրա հարցերին:
Մամուլում լուրեր էին տարածվել, որ այդ կապակցությամբ Գյումրիի ոստիկանության քննչական բաժնում քրեական գործ է հարուցվել: Սակայն Aravot.am-ի հետ զրույցում փաստաբան Լուսինե Սահակյանն ասաց, որ վիրավորանքների համար ինքը դիմել է դատախազություն՝ քրեական գործ հարուցելու Վարդան Ղուկասյանի դեմ, բայց դեռ գործ չի հարուցվել:
Մեր հարցին՝ այն կապակցությամբ, որ դատարանի միջանցքում նաեւ հրմշտոց էր եղել, Վարդան Ղուկասյանի կողմնակիցները հարվածել էին ամբաստանյալի հորը՝ Անիի նախկին ոստիկանապետ Սամվել Սարգսյանին, գործ չի՞ հարուցվել՝ Լուսինե Սահակյանն ասաց. «Հիմա նյութեր ենք նախապատրաստում: Ինքը հիվանդանոցում է, քանի որ նա դեռեւս վերակենդանացման բաժանմունքում է, բացատրություններ չի կարող տալ»:
Հիշեցնենք, որ Սամվել Սարգսյանը դատական այդ նիստից հետո նախաինֆարկտային վիճակում տեղափոխվել էր Գյումրիի բժշկական կենտրոնի վերակենդանացման բաժանմունք:
Կարդացեք նաև
Հռիփսիմե ՋԵԲԵՋՅԱՆ
