Միջմասնագիտական միջազգային հայկական խմբավորում (G2iA) կազմակերպության նախաձեռնությամբ կազմակերպվում է «Ամենամյա միջհամայնքային հանդիպումը Օձունում» ծրագիրը: Ծրագրի մեջ ներգրավված են ոչ միայն Օձունը, այլև 7 գյուղեր ևս. Արդվի, Արևածագ, Այգեհատ, Հագվի, Կարմիր-Աղեկ, Մղարթ և Ծաթեր: Հայ-ֆրանսիական համագործակցությունը դրոշակային ծրագրերից է: Այսօր`հուլիսի 18-ին, «Նոյյան Տապան» լրատվական կենտրոնում ծրագրի մանրամասները ներկայացրեցին Անահիտ Դավթյանը, Վանիկ Բերբերյանը և Արմեն Վալյանը:
Հայաստանում Ռհոն Ալպ ֆրանսիական տարածաշրջանի ներկայացուցիչ, Ռհոն Ալպի ապակենտրոնացված համագործակցության ծրագրի համակարգող Անահիտ Դավթյանը պատմում է, որ ծրագիրը աշխատում է Հայաստանի համայնքների միության հետ 2008 թվականից. «Ծրագրերը ուղղված են կայուն զարգացմանը: Հիմնականում ուղղված են գյուղական համայնքների, գյուղական միջավայրի տնտեսական զարգացմանը»: Ծրագիրը, որ համագործակցում է Օձունի հետ, արդեն 3 տարի է: Կազմակերպությունը ներկայացնում է Օձունում թեյաբույսերի կոոպերատիվ ստեղծելու ծրագիրը, որը լայն տարածում ունեցավ, և Օձունի շրջակա գյուղերը ևս մասնակցում են գործընթացին:
G2iA կազմակերպության հայաստանյան նախագծերի պատասխանատու Արմեն Վալյանը ասում է, որ ծրագիրը կարող է խթանիչ ուժ հանդիսանալ թեյաբույսերի կոոպերատիվի ստեղծման ծրագրի համար: Կազմակերպության շնորհիվ Օձունում ֆինանսավորվեց թեյաբույսերի ստեղծումը, չորանոցի կառուցումը և փաթեթավորումների հետագա գնումը. «2012 թվականին մեզ միացան «Լույս» հիմնադրամի ուսանողները, ովքեր կոոպերատիվի ստեղծման խթանման նպատակով կազմակերպեցին Օձունի գանձեր անունը կրող առաջին փառատոնը, որը հաջողությամբ թույլ տվեց այս տարի ընդգրկելու հարակից յոթ գյուղերը»:
Ֆրանսիայի գյուղական համայնքապետերի Ասոցիացիայի նախագահ, Ֆրանսիայի ամենագեղեցիկ գյուղական համայնքների Ասոցիացիայի փոխնախագահ, Գարժիլես Դամպիեղի գյուղապետ Վանիկ Բերբերյանը նշում է, քանի որ նա ծագումով հայ է, այդ իսկ պատճառով հետաքրքրված է Հայաստանով, նրա զարգացումներով: Արդեն 4 -րդ անգամ է գալիս Հայաստան: Գյուղատնտեսության արտադրանքի մասին գովելի կարծիք է հայտնում. «Ցանկացած տնտեսական գործունեություն, ինչպես նաև գյուղատնտեսությունը համակարգման կարիք է զգում: Օրինակ, Ֆրանսիայում գյուղատնտեսները միավորվում են խմբավորումների մեջ, որպեսզի ավելի հստակ իրագործելու ռազմավարություն ունենան: Կարծում եմ՝ դա կարող է լավ փորձ լինել Հայաստանի համար»: Իսկ վերջում ասաց, որ Հայաստանում միայն սուրճ է խմում, իսկ թեյը առաջին անգամ կփորձի Օձունում:
Կարդացեք նաև
Հիշեցնենք, որ ծրագրի միջոցառումը տեղի կունենա հուլիսի 20-ին, Օձունում:
Մելանյա ՀԱՐՈՒԹՅՈՒՆՅԱՆ
