1in.am. Ինչպես հայտնի է, Շիրակի մարզի ընդհանուր իրավասության դատարանում Գյումրիի նախկին քաղաքապետ Վարդան Ղուկասյանի դստեր նշանածի` Կարեն Եսայանի սպանության գործով դատական վերջին նիստի ժամանակ հնչած վիրավորանքների կապակցությամբ Շիրակի մարզի ոստիկանության քննչական բաժնում քրեական գործ է հարուցվել: Փոխարենը ոստիկանությունում քրգործ չի հարուցվել դատարանի նախասրահում տեղի ունեցած միջադեպի փաստով, որի արդյունքում ամբաստանյալի հայրը` Անիի նախկին ոստիկանապետ Սամվել Սարգսյանը նախաինֆարկտային վիճակում տեղափոխվել է Գյումրիի բժշկական կենտրոնի կարդիովերակենդանացման բաժանմունք: Ըստ բժիշկների՝ նրա մոտ եղել է նախաինֆարկտային վիճակ, հիպերտոնիկ կրիզ և աջ ազդրի սալջարդ: Ըստ մամուլի՝ դատարանի նախասրահում նրան հարվածել են Վարդան Ղուկասյանի կողմնակիցները: Երեկ այս հարցերի շուրջ «Առաջին լրատվական»-ը զրուցեց Շիրակի մարզի ոստիկանապետ Կարեն Բաբակեխյանի հետ:
– Պարոն Բաբակեխյան, կարո՞ղ ենք իմանալ՝ ինչո՞ւ քրեական գործ չի հարուցվել Գյումրիի դատարանում տեղի ունեցած բռնության հետ կապված:
– Պատճառը տուժողի կողմից հայտարարություն չտալն է: Մենք այսօր էլ ենք այցելել, Սամվել Սարգսյանը հրաժարվել է հայտարարություն տալուց՝ հենվելով իր առողջական վատ վիճակի վրա:
– Հնարավո՞ր է սպառնալիքներ են եղել:
Կարդացեք նաև
– Չէ՛, բացառվում է էդպիսի բան: Հուսով ենք, հետագայում կտա, պիտի որ տա: Ի վերջո, մարդը հիվանդանոց է գնացել: Պիտի ինչ-որ մի բանով բացատրի, թե ինչի համար է հիվանդանոց գնացել կամ` ի վերջո, ով է իրեն ծեծել: Ինքը հայտարարել է հիվանդանոց մտնելուց, որ իրեն ծեծի են ենթարկել:
– Իսկ հիմա տուժողի վիճակն ինչպիսի՞ն է:
– Տուժողն ասել է, որ իր վիճակը ծանր է, ինքը կորցրել է հիշողությունը, չի կարողանում հիշել, թե ով է իրեն հարվածել ու ինչ է տեղի ունեցել:
– Պարոն Բաբակեխյան, մամուլի հրապարակումների հիմքով էլ Դուք կարող եք քրգործ հարուցել: Էնտեղ լրագրողներ են եղել և գրել են այդ միջադեպի մասին:
– Ի՞նչ են գրել միջադեպի մասին: Ես բավական մեծ քանակությամբ մարդ եմ բերել էստեղ, ոչ մեկը ականատես չի եղել:
– Լրատվամիջոցներում գրված է, որ Վարդան Ղուկասյանն ու իր կողմնակիցներն են եղել:
– Կարո՞ղ եք բացատրել շահագրգռվածությունը քրեական գործ հարուցելու, կարո՞ղ եք ինձ դա բացատրել, որ անպայման պետք է հարուցվի քրեական գործ: Եթե այսօր կան արդեն նյութեր, դա բավարար հիմք չի հանդիսանում, պետք է անպայման հարուցվի քրեական գործ, հա՞:
– Սակայն փաստ է, որ մինչ այժմ Դուք Վարդան Ղուկասյանին չեք կանչել, բացատրություն չեք պահանջել: Մամուլում, թերթերում գրված է, որ Վարդան Ղուկասյանն ու նրա կողմնակիցներն են հարվածել Սամվել Սարգսյանին:
– Ես ընդհանրապես թերթ չեմ կարդում:
Մարինե Խառատյան
Նյութի մանրամասները կարդացեք սկզբնաղբյուր կայքում
