Այսօր ՌԴ դեսպանատան մոտ դեսպանի համար բերված հատուկ նվերը` ծաղկավոր կանացի խալաթը հանդիսավոր արարողությամբ ՌԴ դեսպանատան մոտ կախելուց հետո «Հայազնի» անդամները հայտարարեցին, որ եթե այդ խալաթը համարվում է պաշտոնական հագուստ Ռուսաստանում, ուրեմն մեր կողմից թող ընդունեն այդ նվերը: «Հայազնի» անդամները ափսոսանք հայտնեցին, որ ցավոք, չեն կարող ողջ դեսպանատան աշխատակիցներին այդ ծաղկավոր խալաթով ապահովել, ուստի պետք է բավարարվեն այդ նմուշով:
Հիշեցնենք, որ «Հայազնը» բողոքի ակցիա էր կազմակերպել ՌԴ դեսպանատան մոտ` պահանջելով արդարացում եւ արժանապատիվ վերաբերմունք 18 մարդու մահվան պատճառ դարձած հայ վարորդ Հրաչյա Հարությունյանի հանդեպ:
«Հայազնի» անդամ Արսեն Սարգսյանի խոսքերով` «Այն, որ ՀՀ իշխանությունները համապատասխան արձագանք չեն տվել, հաստատ մեղավոր են»: Հարցին` Դուք ի՞նչ եք ակնկալում իշխանություններից` նա պատասխանեց. «Հստակ նոտա, որ այսպես ձեռառնոցի չլինի»:
Մեր հարցին կոնկրետ ի՞նչ քայլեր պետք է անեն` հարաբերությունները խզե՞ն ռազմավարական գործընկերոջ հետ` նա պատասխանեց. «Ռազմավարական դաշնակից ասվածը մի քիչ հարաբերական է: Իրենք պետք է մի հատ բացատրեն, թե ինչ է ռազմավարական դաշնակիցը, որովհետեւ ռազմավարական դաշնակիցը զենք չէր վաճառի Ադրբեջանին: Այնպես չի, որ ռազմավարական դաշնակից է»:
Կարդացեք նաև
Հռիփսիմե ՋԵԲԵՋՅԱՆ
