Այսօր «Հայազնի» անդամները ՌԴ դեսպանատան մոտ բողոքի ակցիա էին կազմակերպել: Նրանք պահանջում էին արդարացնել եւ արժանապատիվ վերաբերվել հայ վարորդ Հրաչյա Հարությունյանին, որը ՌԴ-ում 18 մարդու մահվան պատճառ էր դարձել:
«Հայազնի» անդամ Արմեն Հովհաննիսյանի խոսքերով` «Մենք մինչեւ վերջին վայրկյանը ՀՀ քաղաքացու, մեր հայրենակցի կողքին ենք լինելու: Հետեւելու ենք, որ նրա իրավունքները դույզն-ինչ չոտնահարվեն, հետեւելու ենք, որպեսզի դատավարությունը լինի հնարավորինս առավելագույն արդար, լինի արդար վճիռ: Իհարկե, Աստված չտա, բայց եթե անգամ վճիռը կապված լինի ազատազրկման հետ, պետք է հետամուտ լինել, որ նա գա Հայաստան եւ պատիժը կրի Հայաստանում: Հետո, իհարկե Հայաստանի իշխանությունները կարող են այլ որոշում էլ կայացնել: Չի կարելի մարդուն, որը մարդասպան չէ, ահաբեկիչ չէ, բռնաբարող չէ, մոլագար չէ, մարդուն, որը սխալ հանգամանքների զոհն է, թույլ տալ, որպեսզի նախ իրեն որպես անհատ տրորեն, հետո տրորեն իրեն որպես հայ եւ դա օգտագործեն որպես առիթ` հակահայկական ցեղապաշտական տրամադրությունները հրահրելու ՌԴ-ում:
Այն, որ գործը վարում է դատախազ, որը ազգության հայ է, Արմեն Հովհաննիսյանի համոզմամբ, միտումնավոր են արել. «Չեմ կարծում, որ Ռուսաստանում 3, 4 կամ 5 հայ դատախազներ լինեն: Այն մեղադրանքները, որ հնչելու են մեր հայրենակցի նկատմամբ, մեզ կարող են միշտ օրինակ բերել, ասել` բայց չէ՞ որ դատախազն էլ էր հայ: Այդ « յան» ազգանունով հայրենակիցները, որոնց մեկ-մեկ մեզ մոտ ուղարկում են, որպեսզի մեզ դասեր տան, մենք շատ լավ հասկանում ենք նրանց հայկականության գինն էլ, հայ լինելու հանգամանքն էլ: Ես համոզված եմ, որ այդ տիկինը` Գրիգորյանը, լինելու է առավել ագրեսիվ` Հրաչյայի նկատմամբ, որպեսզի ապացուցի, որ նա անաչառ է»:
Հռիփսիմե ՋԵԲԵՋՅԱՆ
Կարդացեք նաև
