Ամեն օր կարելի է ստանալ կարճ հաղորդագրություն՝ զեղչերի, համերգների կամ էլ որոշ ծառայությունների մասին: Հերթական գովազդային կարճ հաղորդագրությունը «Նիկիտա Մոբայլ» ընկերությունից էր.
«Միայնա՞կ ես, շփման կարիք ունե՞ս, ուղարկի՛ր xxx բառը xxx համարին աղջիկների/ տղաների հետ շփվելու համար: 1 հաղորդագրության արժեքը 240 դրամ»:
Որոշեցի օգտվել առաջարկված ծառայությունից: Ուղարկեցի նշված բառը նշված համարին, գումարը պարտաճանաչ գանձվեց, բայց պատասխան կարճ հաղորդագրությունը չստացա: Հասկանալով մարդկային սխալականությունը՝ ևս մեկ փորձ կատարեցի, արդյունքում՝ գումարը գանձվեց, իսկ ես շարունակում էի «միայնակ» մնալ:
Սկսեցի զանգել «Նիկիտա Մոբայլի» «թեժ գիծ»: Աշխատակցուհին սկզբում չէր հասկանում՝ ինչի մասին էի խոսում. ստիպված էի կարդալ ընկերության ուղարկած գովազդ – կարճ հաղորդագրությունը: Նա հավաստիացրեց, որ ես ստացել եմ պատասխան հաղորդագրությունները:
Երկար հարցուփորձից հետո աղջիկը բացատրեց՝ տեխնիկական թերություններ են: Ինչևէ, մի քանի րոպե հետո ընկերության աշխատակիցը նորից կապվեց ինձ հետ՝ պարզվեց՝ ես ստացել եմ հաղորդագրությունը: Այն խնդրում էր ուղարկել տարիքը և անունը, կատարեցի ցուցումները, նույն պատմությունը …
Ընկերության մեկ ուրիշ աշխատակցուհի խնդրեց սպասել «մաքսիմում 20 րոպե»: Մոտ մեկ ժամ հետո «Նիկիտա Մոբայլի» աշխատակցուհին պատասխանեց. «Մեր մոտ երևում է, որ Դուք ստացել եք, սպասեք, գուցե և պատասխան ստանաք»:
Ռուզան Խաչատրյանը նմանատիպ ծառայությունների պատճառով խնդիրներ է ունեցել .«Դա տեղի է ունեցել մոտավորապես 2002-2003 թթ.: Հեռուստաալիքներից մեկով գովազդում էին ծանոթությունների ծառայություն՝ զանգերի միջոցով: Երևի թե էրոտիկ ծառայություն էր՝ գովազդում ինչ-որ կիսամերկ աղջիկներ, բիլիարդ էին խաղում: Եվ մի ամիս հեռախոսիս վճարը կազմեց 500 դոլար: Պարզվեց՝ այդ ժամանակ դեռ անչափահաս տղաս է օգտվել այդ ծառայությունից: Ես չէի պատրաստվում մուծել այդ գումարը, այդ պատճառով էլ դիմեցի դատարան: Պարզվեց, որ միայն մեր մոտ չի այդ խնդիրը: Շատ ընտանիքներ են այդ ընթացքում զարմացել իրենց հեռախոսային հաշվի պատճառով: Ճիշտ է, ընկերությունը փորձել էր հաշտություն հաստատել, բայց ես շարունակեցի դատական գործը, քանի որ ցանկանում էի հրապարակայնացնել այդ խնդիրը»:
Ի դեպ, «Նիկիտա Մոբայլի» հեռախոսավարուհին հավաստիացրեց, որ իրենց ծառայությունը նախատեսված է չափահաս անձանց համար, և իրենց ծառայությունը պահանջում է նշել տարիքը: Իսկ եթե կեղծում են, ապա՝ ընկերությունը պատասխանատվություն չի կրում:
Առաջին հաղորդագրությունից մոտ 24 ժամ հետո ես ստացա «Նիկիտայից» այդքան սպասված հաղորդագրությունը.
«Բարև, կպատմե՞ս քո մասին»:
Ամի ՉԻՉԱԿՅԱՆ
