Այսօր Կոնգրես հյուրանոցի «Միացյալ» դահլիճում Վորլդ Վիժն Հայաստանի եւ ՔՐՈՆԻՄԵՏ բարեգործական հիմնադրամի ներկայացուցիչները ներկայացրեցին իրենց առաջիկա ծրագրերը: Այս երկու կազմակերպության համագործակցության շրջանակներում իրականացվելու է Ճամբարակի մշակութային կենտրոնի եւ Բորյան եղբայրների անվան թանգարանի վերանորոգումը, ինչպես նաեւ շուրջ 3330 երեխայի համար կազմակերպվելու են ամառային ճամբարներ:
Ինչպես Վիժն Հայաստան որակի եւ զարգացման բաժնի ղեկավար Լիանա Պողոսյանը հայտնեց, մշակույթի տանը բացվելու են տարբեր խմբակներ: «Խմբակներում երեխաները կսովորեն տարբեր արհեստներ եւ արվեստ: Այս կերպ փորձում ենք զարգացնել նրանց»:
ՔՐՈՆԻՄԵՏ բարեգործական հիմնադրամի տնօրեն Աննա Սեդրակյանն էլ հայտնեց, որ իրենց հիմնական նպատակն է լինել երեխաների կողքին: «Մենք սատարում ենք նորարար եւ ստեղծագործական նախաձեռնությունները երեխաների համար, այսինքն` ամեն ինչ, ինչ որ կապված է երեխաների կյանքի ու պայմանների բարելավման հետ»,- ասաց նա:
Այս երկու հիմնադրամներն արդեն երկու տարի է, ինչ համագործակցում են: Անցած տարի նրանց համատեղ ջանքերով շուրջ 2800 երեխա այցելել է ճամբարներ:
Կարդացեք նաև
Անդրադառնալով մշակույթի տանը՝ բանախոսները հայտնեցին, որ այնտեղ կգործի նաեւ խանութ, որում կվաճառվեն երեխաների պատրաստած փայտե եւ կավե իրերը: Այս կերպ, ըստ նրանց, կզարգանա տուրիզմը, ինչպես նաեւ վաճառքի արդյունքում կապահովվեն երեխաների ֆինանսական խնդիրները:
Թանգարանում կցուցադրվեն նախկին սովետական ժամանակաշրջանի պարագաները: Ինչպես ասացին, այժմ թանգարանը չի գործում, նրա մի հատվածում տեղադրված են եղել երկրաբանական իրեր, իսկ մյուսում՝ կիսանդրիներ, որոնք շատ տիպիկ խորհրդային ոճով են: Համատեղ համագործակցության արդյունքում, բացի այս երկու հատվածների վերանորոգումից, կլինեն նաեւ գյուղական անկյուն, գրադարան եւ խմբակներ:
«Անցած տարվանից ՔՐՈՆԻՄԵՏԸ դարձավ մեր ճանապարհի լավագույն ընկերը: Մենք համատեղ կարողացանք գյուղական համայնքների երեխաների համար ստեղծել հնարավորություն շփվել միմյանց հետ՝ ուղարկելով ամառային ճամբարներ»,- նշեց Լիանա Պողոսյանը:
«Վորլդ Վիժն Հայաստան» հաղորդագրության եւ մարքեթինգի բաժնի ղեկավար Ժիրայր Էդիլյանն էլ հայտնեց, որ աշնան վերջին կլինի Ճամբարակի մշակութի կենտրոնի բացումը:
Ռուբինա ՍԱՖԱՐՅԱՆ
