Կապանի բնակիչներից ահազանգ ստացանք, որ երեկ ժամեր շարունակ Ողջի գետ թափվող Կավարտ վտակով մոխրագույն ու փրփուրներով հագեցած ջուր էր հոսում: Բնակիչների պատմելով՝ նման տարօրինակ գունային երանգ ունեցող ջուր գետով այսքան ժամանակ չէր հոսել:
«Սենց բան էսքան վախտ չէինք տեսել: Դեղնավուն կամ հողագույն ջուր հոսած կար էս գետով, բայց կապտավուն ու մոխրագույն տեսքով գետը չէինք տեսել, ինքն էլ շատ փրփուրներով», – ասում են գետի տեսքից զարմացած բնակիչները:
Նկարագրված պատկերը երեւում է Կապանի թիվ 1 դպրոցից վերեւ արված գետի կադրերում: Մեր ահազանգից հետո ՀՀ բնապահպանական պետական տեսչության Սյունիքի տարածքային բաժնի մասնագետներն այցելեցին տեղանք եւ փորձեցին պարզել ստեղծված իրավիճակի պատճառը:
«Այս պահին տվյալ տեղանքում ենք: Որքանով հասցրել ենք ուսումնասիրել տարածքը, արտասովոր տեսք ունի գետը, հետքերը երեւում են եւ գունային երանգն էլ թույլ արտահայտված ձեւով նկատելի է: Մինչեւ այս պահը մեր կատարած ուսումնասիրությունից պարզվել է, որ գետի աղտոտումը կապ չունի նախկին կենտրոնական հանքավայրի եւ Լենգրուպայի գործարանի հետ, քանի որ գետի աղտոտումը նկատելի է մինչեւ Աշոտավան հասնելն ընկած տարածքում եւ դրանից ներքեւ կրկին հետքեր չկան: Ներքեւում գտնվող ավտոլվացման կետերը նույնպես չեն կարող ազդեցություն ունեցած լինել, քանի որ գունափոխված հատվածը դրանցից վերեւ է գտնվում: Երեկվա դրությամբ հնարավոր կլիներ շատ արագ պարզել պատճառը, այսօր համեմատաբար թույլ է արտահայտված, ուստի մեզ դեռ չի հաջողվում գտնել աղտոտման աղբյուրը», – ասաց Լեւոն Պետրոսյանը եւ խոստացավ լրացուցիչ տեղեկություններ հայտնել որեւէ մանրամասներ պարզելու դեպքում:
Կարդացեք նաև
Մերի ՍՈՂՈՄՈՆՅԱՆ
