ՀՀ քրեական եւ զինվորական գործերով վերաքննիչ դատարանը, դատավոր Գրիշա Մելիք-Սարգսյանի նախագահությամբ, այսօր քննության էր դրել Արտակ Նազարյանի գործով Հակոբ Մանուկյանի, տուժողի իրավահաջորդի ներկայացուցիչ Ծովինար Նազարյանի, Վահագն Հայրապետյանի բողոքը: Դատարանը ստացել էր գրություն այն մասին, որ ամբաստանյալ Ադիբեկ Հովհաննիսյանը տեղափոխվել է «Կոշ» ՔԿՀ եւ չի կարող մասնակցել այսօրվա դատական անդրանիկ նիստին:
Տավուշի մարզի ընդհանուր իրավասության առաջին ատյանի դատարանը, դատավոր Սամվել Մարդանյանի նախագահությամբ, այս տարվա մայիսի 7-ին դատավճիռ էր կայացրել ՊՆ գումարտակի հրամանատար Հակոբ Մանուկյանի, երկրորդ դասակի հրամանատար Վահագն Հայրապետյանի, շարքայիններ Ադիբեկ Հովհաննիսյանի, Մխիթար Մխիթարյանի, Հարութիկ Կիրակոսյանի վերաբերյալ: Նրանք մեղադրվել էին 2010թ. հուլիսի 27-ին Ղոզլու կոչվող մարտական հենակետում ավագ Արտակ Նազարյանին ինքնասպանության հասցնելու համար:
Ուշադրության արժանի է այն, որ շարքայինները բողոք չէին բերել: Նրանք բայցեւայնպես դատական նիստերի դահլիճ էին ներկայացել: Նրանց պաշտպանները չէին մասնակցում դատական նիստին՝ դատարանին անհայտ պատճառով: Երբ դատավոր Գրիշա Մելիք-Սարգսյանը դիմեց պաշտպանական կողմին, թե ինչ պատճառով են բացակայում ամբաստանյալների պաշտպանները, կապիտան Հակոբ Մանուկյանի պաշտպան Հրանտ Գեւորգյանը հայտնեց, որ իր իրավասության մեջ չի մտնում ներկայացնել տեղեկություններ եւ կողմ արտահայտեց դատական նիստը հետաձգել ոչ այնքան պաշտպանների բացակայության, որքան ամբաստանյալ Ադիբեկ Հովհաննիսյանի բացակայության հիմքով: Դրան կողմ էր նաեւ ինչպես տուժողի իրավահաջորդի ներկայացուցիչ իրավապաշտպան Ռուբեն Մարտիրոսյանը, այնպես էլ մեղադրողները:
Դատական նիստը նշանակվեց հուլիսի 29-ին:
Կարդացեք նաև
![««Նախկին» անարդար համակարգին հաջորդող «աննախադեպ» համակարգը մնաց նույնքան անարդար. ԶՈՒ Լեյտենանտ Արտակ Նազարյանի մահվան [չ]բացահայտումը՝ 14 տարի անց»](https://www.aravot.am/wp-content/uploads/2024/01/Artak-Nazaryan-437x275.jpg "««Նախկին» անարդար համակարգին հաջորդող «աննախադեպ» համակարգը մնաց նույնքան անարդար. ԶՈՒ Լեյտենանտ Արտակ Նազարյանի մահվան [չ]բացահայտումը՝ 14 տարի անց»")
Նշենք, որ ամբաստանյալ Հակոբ Մանուկյանը դատապարտվել է 10, Վահագն Հայրապետյանը, Ադիբեկ Հովհաննիսյանը, Մխիթար Մխիթարյանը՝ 4-ական տարի ազատազրկման: Հարութիկ Կիրակոսյանը դատապարտվել էր 3 տարի ազատազրկման եւ վերացվել էր նրա նկատմամբ ընտրված խափանման միջոց ստորագրությունը:
Ռուզան ՄԻՆԱՍՅԱՆ
