Օրեր առաջ ՀՀ ԱԺ ՀԱԿ խմբակցության ղեկավար Լևոն Զուրաբյանը և ՀԱԿ արտաքին հարաբերությունների հանձնաժողովի նախագահ Վլադիմիր Կարապետյանը հանդիպեցին ԵՄ ընդլայնման և Եվրոպական հարևանության քաղաքականության հարցերով հանձնակատար Շտեֆան Ֆյուլեին: Լ. Զուրաբյանը հանդիպումից հետո հայտարարեց. «Ընդհանուր առմամբ, իհարկե, եղավ բավականին լուրջ վեճ, և մենք ամեն հարցում համաձայն չէինք: Եվ բավականին կոշտ վեճի դրվագներ էլ եղան»:
Aravot.am-ը Վ. Կարապետյանից հետաքրքրվեց` մասնավորապես ի՞նչ «կոշտ» հարցեր են քննարկվել: Պարոն Կարապետյանը պատասխանեց. «Մենք մեր վերապահումները փոխանցեցինք, որ ԵՄ-ն ոչ բոլոր հարցերում է համախմբված: Լսեցինք այդ խնդիրների վերաբերյալ հանձնակատարի մոտեցումները: Մենք բարձրացրել էինք քաղբանտարկյալների առկայության խնդիրները, որ արհեստական կերպով Տիգրան Առաքելյանի և մեր երիտասարդների գործի քննությունը ձգձգվում է, և չկա որևէ արձագանք ԵՄ-ի կողմից, կամ ՀՀ Ընտրական օրենսգրքի փոփոխության կոչերը, որոնք հնչում էին ընտրություններից առաջ, մինչդեռ ընտրություններից հետո չկար արձագանք այդ խնդիրների վերաբերյալ: Ուստի որոշակի վերապահումներ են առաջանում, ինչի մասին մենք բաց խոսում ենք մեր գործընկերների հետ»:
Հետաքրքրվեցինք` եվրոպացի չինովնիկների նման պահվածքի պատճառը ո՞րն է: Վ. Կարապետյանը պատասխանեց. «Նրանք շատ ուզում են, որ ՀՀ-ն ստորագրի Ասոցացման համաձայնագիրը և գնում են որոշակի զիջումների, ընդառաջում են ՀՀ իշխանություններին»:
Մեր մյուս հարցին` ինչո՞ւ է համաձայնագրի տեքստը գաղտնի պահվում, պարոն Կարապետյանն այսպես արձագանքեց. «Քանի դեռ բանակցում են, դա նորմալ է, այս հարցում խնդիր չեմ տեսնում»:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը` ՖՈՏՈԼՈՒՐ-ի
ՈՒ սա մի ժամանակ մեր արտգործնախարարությունում ազատ մուտք ու ելք է ունեցել….