«Էլայ լիլլի» ամերիկյան ընկերությունը, որն ամբողջ աշխարհում հայտնի է մարդու օրգանիզմի՝ ինսուլինին ամենամոտը արտադրող իր ինսուլին դեղամիջոցով եւ համարվում է գերմաքուր ինսուլին արտադրող, ընկերության դեղերն էլ օրիգինալն են, Հայաստանում այս ընկերության դեղամիջոցին այդքան էլ հավանություն չի տրվում: Այսօր «Հենարան» մամուլի ակումբում հյուրընկալված «Էլայ լիլլի»-ի տարածքային մենեջեր Սիլվա Բարսեղյանի խոսքերով, մեր երկիրը գերադասում է իր դիաբետով հիվանդ մարդկանց համար ձեռք բերել կիսասինթետիկ բաղադրությամբ ինսուլին:
Վերջերս կառավարությանը ինսուլին գնելու ցանկություն է հայտնել մի ընկերությունից, որը հենց կիսասինթետիկ ինսուլինի առաջարկ է արել, ընդ որում ավելի թանկ գնով, քան «Էլայ լիլլի»-ի առաջարկն ե եղել կառավարությանը: Վերջնական պայմանավորվածությունը դեռեւս ձեռք չի բերվել, բայց ամերիկյան ինսուլինի հայաստանյան ներկայացուցիչները վստահ են, որ կառավարության ընտրությունը, անհասկանալի պատճառներով, հենց կիսասինթետիկ ինսուլինի վրա էլ կանգ կառնի: Բանակցությունների ընթացքում գնային առաջարկ ստացած երեք ընկերություններից, կառավարությունը միայն նրանց է պայմանագրի նախագիծ ուղարկել:
«Էլայ լիլլի»-ին կառավարությանն առաջարկում է կարճատեւ եւ միջին ազդեցության ինսուլինի 10 մլ սրվակի համար 2103,7 դրամ, իսկ կառավարության նախընտրած կազմակերպությունը, որի անունը Սիլվա Բարսեղյանը նպատակահարմար չգտավ հրապարակել նույն չափաքանակի համար` 3267 դրամով:
Տիկին Բարսեղյանը հաշվարկել է ու պարզել, որ հինգ տարիների ընթացքում, պետությունն իրենց ընկերությունից ձեռք բերելու դեպքում միայն կարճատեւ եւ միջին ազդեցության ինսուլինի 10 մլ սրվակի համար տնտեսում է 146 միլիոն 575. 800 դրամ, իսկ ընդհանուր առմամբ, 251 միլիոն 755.200 դրամ, եթե կառավարությունը ցանկություն հայտնի գնել նաեւ կարճատեւ ազդեցության եւ միջին ազդեցության 10 միլիգրամանոց սրվակներով ինսուլին եւս: Ինսուլին ներկրող ընկերության հետ պայմանագիրը մեր կառավարությունը կնքում է 5 տարով:
Կարդացեք նաև
Այսպիսի խտրականությունների հանդիպելիս, տիկին Բարսեղյանը վստահեցրեց, որ. «Ցավոք շատ բրենդային ընկերություններ օրիգինալ դեղեր արտադրող, լքեցին Հայաստանը, քանի որ մեզ մոտ դեղարտադրողները պաշտպանված չեն: Հնարավոր է «էլայ լիլի»-ի տարածաշրջանային գրասենյակը նույնպես տեղափոխենք Թբիլիսի: Մեր կազմակերպությունն այստեղ երբեւէ ինսուլինի տենդեր չի հաղթել` չնայած որ ամենալավ ու հարմար գներով ինսուլինն ենք առաջարկում առողջապահության նախարարությանը»:
Տիկին Բարսեղյանը նաեւ ասաց, որ աշխարհում Հայաստանը միակ երկիրն է մնացել, որտեղ դեռ դիաբետիկ հիվանդները դեռ կախված են «սառնարանում պահվող ինսուլինից», մինչդեռ ամբողջ աշխարհն անցել է գրիչների սրվակով եւ քարթրիջներով ինսուլինի գործածմանը, որը հարմար է եւ դրա օգտագործումը տարբեր միջավայրներում ավելորդ հոգս չի պատճառում շաքարային դիաբետով մարդուն:
Սիլվա Բարսեղյանի մեկնաբանություններն ու դժգոհությունները ՀՀ կառավարության վարած քաղաքականությունից այս ոլորտում` առավել մանրամասն` տեսանյութում
Լուսինե ԲՈՒԴԱՂՅԱՆ
