27-րդ համաշխարհային ուսանողական խաղերում շախմատիստներն այսօր ավարտում են պայքարը:
Հայաստանցի գրոսմայստեր Զավեն Անդրիասյանը ութ հնարավորից 6,0 միավորով մրցաշարային աղյուսակը գլխավորող վեցյակի մեջ է եւ հանգամանքները հաջող զարգանալու դեպքում կարող է առնվազն մրցանակային տեղ զբաղեցնել: Այսօր եզրափակիչ տուրում Զավենը սպիտակներով խաղում է ֆիլիպինցի գրոսմայստեր Վեսլի Սոի հետ:
Նախորդ տուրում ռուսաստանցի Մաքսիմ Մատլակովից կրած պարտությունը զգալիորեն բարդացրել է մեր երկրորդ մասնակցի՝ Ռոբերտ Հովհաննիսյանի, դիրքը մրցաշարային աղյուսակում: Նա առաջատարներից ետ է մնում մեկ միավոր եւ 16-րդ հորիզոնականում է: Այսօր Ռոբերտը նույնպես սպիտակներով հանդիպում է Թուրքմենիան ներկայացնող միջազգային վարպետ Մակսաթ Ատաբաեւի հետ:
Աշոտ ՀԱԿՈԲՅԱՆ
