Այսօր Կոտայքի մարզի Պռոշյան գյուղի գյուղապետի ընտրության ընթացքում, պռոշյանցի մի տատիկ, կարծելով, թե մեր լրագրողը համագյուղացի է, վերջինից փորձել է պարզել, թե վերջապես նա ում օգտին պետք է քվեարկի. «Հիմա ես երկրորդը ընտրե՞մ, թե՞ առաջինը»,-հարցրեց տատիկը: Երբ փորձեցինք տատիկից ավելի մանրամասն պարզել, թե ինչ նկատի ուներ, այդ հարցը տալով, վերջինս հրաժարվեց որեւէ բառ ասելուց:
Պռոշյանում գյուղապետի ընտրություններ նշանակվեցին այն բանից հետո, երբ սույն թվականի ապրիլի 2-ի վաղ առավոտյան գործող գյուղապետ, ՀՅԴ-ական Հրաչ Մուրադյանը սպանվեց գյուղապետարանի մոտ, իսկ այսօր Պռոշյանի գյուղապետի պաշտոնի համար պայքարում են ինքնաառաջադրված թեկնածուներ՝ Պռոշյան համայնքի ղեկավարի տեղակալ, ՀՅԴ անդամ Վովա Սահակյանը, ՀՀԿ անդամ Արթուր Մուրադյանը եւ անկուսակցական, «ՀՀ նախագծերի պետական արտագերատեսչական փորձաքննություն» ՓԲԸ գլխավոր մասնագետ Ալեքսան Ալեքսանյանը:
Քրիստինա ՄԻՐԶՈՅԱՆ
