Արարատյան հայրապետական թեմի առաջնորդ Նավասարդ արքեպիսկոպոս Կճոյանի և ՀՀ վարչապետ Տիգրան Սարգսյանի անվան հետ կապված «օֆշորային» սկանդալը շարունակվում է քննարկվել: «Մենք ենք մեր երկրի վաղվա տերը» միությունը ստորագրահավաք է կազմակերպել, որով վերջինները պատրաստվում են Արարատյան հայրապետական թեմի առաջնորդ Նավասարդ արքեպիսկոպոս Կճոյանին կարգալույծ անելու պահանջով դիմել Ն.Ս.Օ.Տ.Տ. Գարեգին Բ Ամենայն հայոց կաթողիկոսին:
Aravot.am-ը «Քայքայիչ պաշտամունքից տուժածների օգնության և վերականգնողական կենտրոն» հ/կ-ի նախագահ Ալեքսանդր Ամարյանից հետաքրքրվեց՝ հավատո՞ւմ է, որ արքեպիսկոպոս Կճոյանը ներգրավված է այդ «օֆշորային» գործարքներում: Ա. Ամարյանը նշեց, որ այս գործընթացն ունի քաղաքական «աստառ», այն ուղղված է հիմնականում ՀՀ վարչապետ Տիգրան Սարգսյանի դեմ: Իսկ արքեպիսկոպոսի ներգրավվածության մասին հարցին այսպես արձագանքեց. «Կա անմեղության կանխավարկած, փաստերն ու արձագանքը կլինեն միաժամանակ»:
Հետաքրքրվեցինք` այն, որ այսպիսի սկանդալներին առնչվում են ՀՀ բարձրաստիճան պաշտոնյաների և հոգևորականների անուններ, վարկաբեկիչ չէ՞ ՀՀ-ի համար, Ա. Ամարյանը արձագանքեց. «Այսպիսի սկանդալներ ողջ աշխարհում կան: Դա բոլորի համար է վարկաբեկիչ, առավել ևս, եթե հիմնավորվի փաստը, դա կլինի վարկաբեկիչ»:
Տաթև ՀԱՐՈՒԹՅՈՒՆՅԱՆ
