Սուրենավան համայնքում հատված 130-ից ավելի ծիրանենիները մի գիշերում ոչնչացրել էին, սակայն մինչ օրս հայտնի չէ՝ ով է ծառերի սպանդը կազմակերպել
Անցյալ տարվա հունվարի 4-ին Արարատի մարզի Սուրենավան համայնքում մի ամբողջ ծիրանենիների այգի հատվեց: Անհայտ անձինք քոքից կտրել էին 130-ից ավելի ծիրանի ծառեր ու դրանք թողնելով կիսականգուն վիճակում՝ հեռացել:
Սուրենավանի բնակիչ Արմեն Ալաջանյանը, որին է պատկանում ծիրանենիների այգին, «Առավոտի» հետ զրույցում պատմեց. «Չարագործները բոլոր ծառերը մեկ առ մեկ կտրել են ու այնպես արել, որ առաջին հայացքից որեւէ մեկը չնկատի, թե ծառերը հատված են: Ծառին մոտենալիս եւ դիպչելիս է միայն պարզ դարձել, որ դրանք անկենդան են. ծառերը մեկը մյուսի հետեւից տապալվել են գետնին: Նրանք միտումնավոր էին ծառերը թողել կանգնած, որ որեւէ մեկը հեռվից չնկատի, որ դրանք հատված են»:
Արմեն Ալաջանյանի խոսքերով՝ մեկ հեկտարի վրա գտնվող ծիրանենիներն արդեն 6-7 տարվա ծառեր էին եւ այս տարի արդեն պետք է բերք տային: Բացի այդ, գործազուրկ Ալաջանյանի միակ զբաղմունքը հայրենիքում եղած ժամանակ հողագործությունն է եղել եւ ծիրանի ծառերը տնկել է հայրենի գյուղում ինչ-որ գործ սկսելու ակնկալիքով: Սակայն, ինչպես ինքն է ասում, այդպես էլ չի հասցրել պտուղները վայելել:
Թե ինչո՞ւ են այգին այդպես անխնա ոչնչացրել՝ ո՛չ այգու սեփականատերը, ո՛չ էլ նրա համագյուղացիները չեն հասկանում. «Չեմ պատկերացնում, թե ոնց կարելի է վերցնել եւ ամբողջ այգին ոչնչացնել, նման վանդալիզմի ով է ընդունակ, դա նույնն է, որ երեխան սկսի քայլել ու վերցնես ոտքերը կտրես: Այդպիսի դաժան համեմատություն եմ անում, որ չարագործները հասկանան, թե ինչ ցավ են պատճառել ինձ ու նոր-նոր ոտքի կանգնող այգուս»:
Արմեն Ալաջանյանը, որը ներկայում բնակվում է Բելգիայում, չի բացառում, որ իր այգու հետ այդպես են վարվել իր քաղաքական ընդդիմադիր հայացքների համար:
«Առավոտի» հետ հեռախոսազրույցում Արմեն Ալաջանյանն ասաց, որ հենց այդ ճնշումների պատճառով էլ ինքը հեռացել է Հայաստանից եւ չի վերադառնա այնքան ժամանակ, մինչեւ որ իր կյանքի համար այլեւս վտանգ չներկայացնի իր քաղաքական դիրքորոշումը. «Երեւի որ մնայի, մի օր էլ ինձ մի տեղից գտնեին»:
Սպանդի ենթարկված այգու վերաբերյալ գործը գտնվում է Վեդիի ոստիկանությունում: Մինչ օրս, Արմեն Ալաջանյանի խոսքերով, որեւէ նորություն չկա, եւ հանցագործությունը բացահայտված չէ:
Երեկ «Առավոտը» ՀՀ ոստիկանությունից հետաքրքրվեց, թե ի՞նչ փուլում է Սուրենավանի ծիրանենիների գործը:
«Գործը կասեցվել է հանցագործություն կատարած անձի ինքնությունը հայտնի չլինելու պատճառաբանությամբ, բայց օպերատիվ-հետախուզական միջոցառումները շարունակվելու են»,- մեր հարցերին ի պատասխան՝ հայտնեցին ոստիկանության հասարակայնության հետ կապի եւ լրատվության վարչությունից:
ԼՈՒՍԻՆԵ ԲՈՒԴԱՂՅԱՆ
«Առավոտ» օրաթերթ
