«Գարուն», «Ծաղկած խնձորենի», «Խառնաշփոթ», «Նավամատույց»` այսպես էին վերնագրված Մհեր Չատինյանի նկարներից մի քանիսը, որոնք այսօր ցուցադրվեցին «Ներկայ» արվեստների կառավարման և ստեղծարարության կենտրոնում:
Մհեր Չատինյանը 23 տարեկան է, նկարել սկսել է 17 տարեկանից, ապրում է Վանաձորում, ու հենց այդտեղ ունեցել 3 անհատական ցուցահանդես, Երևանում առաջին ցուցահադեսն է: Միջոցառման խորագիրը`«Գտնվել են գույներ»: Մհերը ներկայացրել է իր նկարների երկու շարք, որտեղ պատկերված են ծաղկած ծառեր և նավակներ: 3 ամիս պահանջվեց որպեսզի ցուցահանդեսը հանձնվի հանդիսատեսի դատին. «Սրահի փոքր լինելու պատճառով քիչ նկարներ են ներկայացրել, հետագայում կներկայացնեմ մի քանի շարք ևս», բացատրում է նկարիչը: Նա կարծում է, որ հանդիսատեսը իր նկարներից գույներ կվերցնի, իսկ ինքը գարնանային տրամադրություն է փոխանցել:
«Ներկայ» արվեստների կառավարման և ստեղծարարության կենտրոնի տնօրեն Էմմա Հարությունյանը ասում է, որ նրանք ցանկանում էին հայ արվեստի մասին խոսող, հայ արվեստը արժեւորող հարթակ ստեղծել, որը շարունակական է լինելու: «Ներկայ»-ի ստեղծողներից Անի Հարությունյանը բացատրում է, թե ինչու ընտրեցին Մհերի նկարները. «Քանի որ նա իր արվեստով նույնքան զգայուն է, նույնքան անկեղծ է, որքան մենք ուզում ենք լինել մեր ձեռնարկած գործում»:
Մհեր Չատինյանի ցուցահանդեսը կշարունակվի մինչև հուլիսի 18-ը:
Մելանյա ՀԱՐՈՒԹՅՈՒՆՅԱՆ
