Երևանի մասին հազարավոր երգեր են գրվել, ոմանց կատարումները մնացել են իսկական երևանցիների սրտերում՝ հուզել, ներշնչել, իսկ ոմանց կատարումներն էլ արագ մոռացվել են: Այսօր «The Club»-ում մթնոլորտը այլ էր, հայկական ռեգգի` «Ռեինկարնացիա» խումբը կրկին լավ նորությամբ էր հանդիպում իր երկրպագուների հետ. այս անգամ նրանք ներկայացնում էին «Երևան» երգի և համանուն ֆիլմի շնորհանդեսը: Ինչպես մեզ հետ զրույցում նշեց խմբի մենակատար, երգի բառերի և երաժշտության հեղինակ Ռոլանդ Գասպարյանը՝ այս երգը նամակ էր՝ ուղղված Երևանին, նրա խոսքով՝ շատերը դիտելով և՛ ֆիլմը , և՛ լսելով երգի բառերը, մի պահ կսթափվեն, որովհետև իրենց երգը այսօրվա Երևանի մասին է՝ այն Երևանի, որտեղ օր օրի շատ շենքեր քանդվում ու ավիրվում են:
«Իրենց քաղաքի՝ Երևանի մասին շատերն են երգեր նվիրել,-ասում է Ռոլանդ Գասպարյանը, — Երևանը իրենց երգերում ներկայացրել ուրախ, գունավոր մի քաղաք, մեր երգը իրական, իսկական Երևանի մասին է, մեր երգում այսօրվա Երևանն է, վստահ եմ՝ այս երգը դեռ շատերին է մտածելու տեղիք տալու, որովհետև այսօր ինչ քանդվում և ավիրվում է, ինչ- որ չափով նաև մեր մեղքն է, ձեռքները ծալել նստելով ոչինչ դուրս չի գա, իրերն իրենց անուններով կոչելու ժամանակն է»: Ըստ խմբի մենակատար Ռոլանդ Գասպարյանի՝ այսօր Երևան քաղաքին իսկական գույներն են պակասում, այսօր ամենից շատը Երևանը դրա կարիքն ունի: «Երևան» ֆիլմի ռեժիսորն Արտյոմ Հովակիմյանն է, իսկ նախագծի հեղինակը Հայկ Բիանջյանը, ում լուսանկարների հիման վրա էլ նկարահանվել է ամբողջ ֆիլմը: Լուսանկարներում (https://www.bianjyan.com/ ) պատկերված է Երևան քաղաքի կենտրոնական փողոցներն ու պատմամշակութային շենքերը, որոնք օր օրի քանդվում են: Լուսանկարիչ Հայկ Բիաջյանն ասում է. «Երևան քաղաքի այսօրվա վիճակը բոլորին է հայտնի, և խոսելով այսօրվա պատմամշակութային տարածքների ավերման մասին, ես պետք է ցավով նշեմ, որ այսօր Երևանի կենտրոնում կա մի շենք, որը գտնվում է Տերյան 11ա հասցեում է և այն նույնպես օր օրի մեր աչքի առջև պայքարում է և համառորեն չի ուզում լքել Երևանը, կարծես թե ամեն օր այդ շենքը մեզ հիշեցնում է Հին Երևանի մասին»: Ահա թե՛ լուսանկարչի, և թե՛ Ռոլանդ Գասպարյանի համատեղ աշխատանքի շնորհիվ էլ ստեղվել է «Երևան» ֆիլմը՝ ևս մեկ անգամ իսկական Երևանցիների ուշադրությունը այս խնդրի կողմը ուղղելու համար:
Կարդացեք նաև
Օվսաննա Սիմոնյան
