«Ներկայանում եմ 3 աբստրակտ գործերով: Աբստրակցիոնիզմն այն եզակի ուղղություններից է, որ բավականին լուրջ զարգացում է ապրել Հայաստանում ու շատ ուրույն տեղ ունի համաշխարհային մշակույթի մեջ»,-այսօր «Ոսկե ծիրան» Երեւանի 10-րդ միջազգային կինոփառատոնի շրջանակներում կայացած «Արեւելքից արեւմուտք. Մոդեռնից`պոստմոդեռն, Հայ արվեստագետներ» ցուցահանդեսի ժամանակ Aravot.am-ի հետ զրույցում նշեց նկարիչ Գարիկ Կարապետյանը:
Առաջին անգամ հանդիսատեսը, արվեստագետները եւ փառատոնի հյուրերը հնարավորություն կունենան հայացք նետել հայ գեղարվեստի հարյուրամյա պատմությանը` սկսած 19-րդ դարի վերջից մինչեւ 20-րդ դարի սկիզբը: Հայ արվեստագետները`ավելի քան 70 հեղինակներ նման կազմով երբեւիցե չեն ներկայացվել մեկ հարթակի վրա:
Նկարչի խոսքով՝ սկսած 70-ական թվականներից Հայաստանում կային տաղանդավոր աբստրակցիոնիստներ, 21-րդ դար եկան նոր նկարիչներ, նրանց էվոլուցիան տեսանելի էր.
«Նկարներն իմ կյանքն են, ներկայացնում եմ իրականության խտացված պատկերը: Մի փոքր մակերեսի վրա դուք տեսնում եք մի բան, որը իմաստավորում է ձեր կյանքը: Իրականությունն իմ կյանքում սեւ եւ սպիտակ է, չկա կոնֆլիկտ, մեկը մյուսին օգնում են ճշմարտությունը հասկանալու համար: Նրանց համադրությունը պետք է տեսնել, այն աչքի նման պարզ ու բարդ է»:
Կարդացեք նաև
Աշխարհի հայ նկարիչների միության նախագահ Ղազար Միրզոյանը մեզ հետ զրույցում նշեց, որ պարզապես ցնցված է: Այս տեսակի լավ ցուցահանդես երբեւէ չէր եղել Հայաստանում, առաջադեմ քայլ է արվել: Համարձակ պետք է լինել, մեր երկիրը դրանից միայն կշահի:
Անժելա ՇԱՀՈՒՄՅԱՆ
