«Այս տարի Բուլղարիայի Բուրգաս քաղաքում անցկացված Եվրոֆոլկի Եվրոպայի առաջնությանը, Հայաստանը ներկայացնող երիտասարդներն արժանացան ոսկե մեդալի: Սա մեր 2-րդ մասնակցությունն էր այս փառատոնին»,-այս մասին այսօր «Պոստ Սկրիպտում» մամուլի ակումբում ասաց «Gold Stars» պարային համույթի գործադիր տնօրեն Հասմիկ Էլիզբարյանը, հավելելով, որ առաջնությունը դեռ չի ավարտվել և հուլիսի 14-ին պարզ կդառնա «Գրան պրի» մրցանակակիրը, որը կընտրվի ոսկե մեդալ ստացած խմբերից: «Նախորդ տարի Եվրոպայի չեմպիոնի կոչմանն արժանացավ բրազիլական խումբը և մենք չնեղվեցինք դրանից, քանի որ իրենք իսկապես լավն էին, իսկ մենք կրկին արժանացանք ոսկե մեդալի»,-ասաց Էլիզբարյանը:
Վերջինիս խոսքով` ոսկե մեդալի արժանացած մասնակիցներից ժյուրին կընտրի հաղթող մասնակցին` «Գրան պրի» մրցանակը ուղարկելով այդ երկրի Մշակույթի նախարարություն:
Հայկական ֆոլկլոր բարեգործական հիմնադրամի նախագահ Սամվել Գալստյանի պնդմամբ` Հայաստանից միայն մեկ պարային խմբի մասնակցությունը պայմանավորված է ֆինանսի բացակայությամբ. «Ֆինանսական վիճակը սուղ է, սա է պատճառը, որ մեր մոտից ներկայացել է մեկ խումբ, ի տարբերություն Թուրքիայի, որտեղից ներկայացված էին երեք պարային խմբեր»:
Էլիզբարյանն էլ հավելեց, որ Հայաստանում բացի պետական խմբերից, ոչ մի այլ խումբ չի հովանավորվում: Բոլորը ինքնաֆինանսավորման հենքի վրա են գտնվում, այնուհետև հպարտորեն նշելով, որ մեր պարային խումբը լավագույններից էր. «Թուրքական պարային խմբերը շատ ընկճված էին: Մեր տարազները շատ գեղեցիկ էին և բոլորը ցանկություն էին հայտնում մեր երեխաների հետ լուսանկարվել»:
Կարդացեք նաև
Նա նշեց նաև, որ ժյուրիի կազմը բաղկացած է եղել 4 հոգուց, որից մեկը թուրք էր, սակայն դա չի խանգարել, որպեսզի մենք նվաճենք ոսկե մեդալ. «Յուրաքանչյուր խմբին տրվում է տասնհինգ րոպե ժամանակ , որի ընթացքում մենք ներկայացրել ենք չորս պարային համարներ, իսկ ծափահարությունները վկայում էին այն մասին, որ ամենաբուռն խումբը մերն էր, և եթե թուրք ժյուրիի անդամը որոշեց, որ պետք է ոսկե մեդալ հանձնվի, ուրեմն իսկապես լավն ենք եղել»,-ընդգծեց Էլիզբարյանը:
Բանախոսները կարծում են, որ բոլոր այն խմբերը, որոնք Հայաստանից դուրս ներկայացնում են մեր մշակույթը, պետք է ֆինանսական օժանդակություն ստանան. «Մենք միշտ մեկնել ենք մեր ֆինանսներով, և սա առաջին անգամն էր, որ ստացել ենք ֆինանսական աջակցություն, որի համար շնորհակալ ենք»,-ասաց Սամվել Գալստյանը:
Քրիստինա ՄԻՐԶՈՅԱՆ
