«Այն, որ վերջին մեկ տարում ընդամենը ութ գործ է լսվել արբիտրաժոււմ, բայց ընդհանուր գործերը հասնում են մի քանի հազարի, սա խոսում է այն մասին, որ մենք ունենք խնդիրներ»,-այսօր ՀՀ արդարադատության նախարարության նիստերի դահլիճում ԱՄՆ ՄԶԳ Ձեռնարկությունների զարգացման և շուկայի մրցունակության ծրագրի և ՀՀ արդարադատության նախարարության միջև մտադրությունների հուշագրի ստորագրման արարողության ժամանակ հայտարարեց ՀՀ արդարադատության նախարար Հրայր Թովմասյանը:
Մտադրությունների հուշագիրն ուղղված է Հայաստանում գործարար միջավայրի խթանման բարեփոխումներին և վեճերի կարգավորման այլընտրանքային համակարգի բարելավմանը:
Հ. Թովմասյանը նշեց, որ ԱՄՆ-ն հնարավորության դեպքում ողջամիտ ժամկետներում օգնել է իրենց իրականացնելու բարեփոխումներ: Միևնույն ժամանակ նախարարը շեշտեց, որ ՀՀ-ում գոյություն ունեցող խնդիրները մենք ինքներս պետք է լուծենք:
Կարդացեք նաև
Հայաստանում ԱՄՆ դեսպան Ջոն Հեֆերնն էլ հայտարարեց. «ԱՄՆ-ն փորձում է ճիշտ գործընկերներ գտնել, ուստի արդարադատության նախարարության հետ մի շարք համագործակցության եզրեր ենք գտել»:
Անդրադառնալով ՀՀ գործարար միջավայրում իրական բարեփոխումներին վերաբերող հարցին, Ջ. Հեֆերնն ասաց. «Հարցը ՀՀ տնտեսության խնդիրների մասին չէ, խնդիրն այն է, թե ՀՀ-ում ունե՞նք լավ գործընկերներ համագործակցության համար, թե՝ ոչ: Այդ պատճառով էլ այսօր այստեղ ենք և աշխատում ենք դատաիրավական բարեփոխումների շրջանակներում»:
Դառնալով խնդիրներին՝ Հ. Թովմասյանն առանձնացրեց այն, որ դրանք խոչընդոտում են գործարար շրջանակներին, հանգեցնում են դատավորների գերծանրաբեռնվածությանը: Գործարար շրջանակների բարեփոխումների մասին խոսելով նախարարը նշեց, որ Հոլանդիայի և Բելգիայի շրջանակներում ենք գտնվում, ինչպես նաև տեղեկացրեց, որ հաջորդ տարվանից կսկսեն գործել հանրային ծառայությունների գրասենյակները:
Նշենք նաև, որ ՀՀ արդարադատության նախարար Հ. Թովմասյանը ԱՄՆ դեսպանին պարգևատրեց նախարարության Շահամիր Շահամիրյանի անվան ոսկե հուշամեդալով:
Տաթև ՀԱՐՈՒԹՅՈՒՆՅԱՆ
