«Սոցիոմետր» սոցիոլոգիական կենտրոնի ղեկավար Ահարոն Ադիբեկյանը վստահ է, որ բարեկեցությունը կապ չունի ծնելիության հետ: «Հայրենական մեծ պատերազմից հետո Հայաստանը ՍՍՀՄ երկրների մեջ ամենաբարձր ծնելիությունը ուներ, եւ մարդիկ ամենեւին բարեկեցիկ չէին ապրում»,- ասաց նա՝ հակադարձելով ժողովրդագիր Ռուբեն Եգանյանին, ով պնդում էր, որ Հայաստանի հասարակա-քաղաքական եւ սոցիալ-տնտեսական իրավիճակն է դարձել ազգաբնակչության թվի կտրուկ անկման պատճառ: Այս բանավեճն այսօր տեղի էր ունենում «Ուրբաթ» ակումբում՝ ազգաբնակչության համաշխարհային օրվա առիթով:
Պարոն Եգանյանը նշեց, որ ինքը միայն բարեկեցությունը նկատի չունի, ի վերջո, աշխարհի շատ բարեկեցիկ երկրներում քիչ երեխա են ունենում, խնդիրը երկրի ընդհանուր իրավիճակն է:
Պարոն Ադիբեկյանը ծնելիության նվազման շեշտը դնում էր այլ գործոնների վրա՝ ընտանիքի կազմման սխեման չի դրված մեր ընտանիքներում: Ըստ սոցիոլոգի՝ մայրերը հիմա աղջիկներին սխալ են խրատում, չեն ասում, որ բալիկ ջան, պետք է չորս երեխա ունենաս, երկու տղա, երկու աղջիկ, քանի որ քրոջը քույր է պետք, եղբորը՝ եղբայր, այլ ասում են՝ քեզ պե՞տք է երեխա ունենաս, ընկնես կրակը… Մեկ այլ հանգամանք էլ շեշտեց. «Մայրերը, ապահարզանից վախենալով, քիչ երեխա են ունենում, իսկ քիչ երեխա ունենալով՝ ապահարզանի ռիսկը մեծանում է»,- ապա ասուլիսին ներկա լրագրողուհիներին խորհուրդ տվեց՝ «Որ ամուսնանաք, գոնե երեք երեխա ունեցեք, որ չբաժանվեք»:
Սոցիոլոգի այս «տատական մեթոդներին» համամիտ չէր ժողովրդագիրը: Պարոն Եգանյանը պնդում էր, որ մինչեւ չլուծվեն երկրի առաջ ծառացած քաղաքական, հասարակական, տնտեսական, բարոյահոգեբանական եւ սոցիալական խնդիրները՝ ծնելիության աճ չի նկատվի: Եթե ինչ-ինչ պատճառներով էլ հանկարծ ծնելիությունը մեծանա, վտանգը մեծ է, որ մենք երեխաներ կունենանք՝ արտասահմանի համար, որ վաղը մյուս օրը թողնեն գնան երկրից, որտեղ իրենց ապագան անորոշ է:
Կարդացեք նաև
Մելանյա ԲԱՐՍԵՂՅԱՆ
