Հայտնի երգչուհի Մարիետա Բադալյանը Ֆեյսբուքի իր էջում գրել է. «Հայաստանում գոյություն ունեցող այսքան կոմիտե, կուսակցություն կոչվածների մեջ մի հայրենակցական միություն կա, որ կոչվում է «Տավուշ»: Ասեմ, որ եւ անվանումը, եւ ինքն ինձ շատ հոգեհարազատ են նրանով, որ հորս ծննդավայրն է:
Մի օր, 2001թվին ինձ շատ սիրալիր ձեւով մանդատ էր ուղարկվել այդ հայրենակցական կոմիտեի համագումարին ներկա լինելու համար: Սիրով գնացի: Խոստովանեմ, որ բոլոր ելույթները լսելուց հետո ես բարձրացա ամբիոն եւ սկսեցի քննադատել եւ բարձրացնել եւ դեպի Տավուշ տանող ճանապարհների, նաեւ այնտեղ գոյություն չունեցող(այսինքն՝ մի կիսատ-պռատ շինություն կար,որ հավասար էր չլինելու, քանզի չէր գործում) եկեղեցու ցավոտ հարցերը: Իհարկե, ելույթս բուռն ծափերի արժանացավ, որովհետեւ, իմ կարծիքով, ամենապրակտիկ հարցադրումները ես դրեցի: Ճիշտն ասած՝ ես էլ զարմացա իմ ելույթից, պարզապես Տավուշ գնալ-գալուց քաջ ծանոթ էի այնտեղ գոյություն ունեցող խնդիրներին, եւ մի լրացուցիչ ուժ ինձ թելադրում էր այդ ամենի մասին այդքան ընդգծված բարկությամբ եւ պաթոսով խոսել, անգամ մի քանի քնած պատգամավորներ արթնացան: Իմ այդ ակտիվ ելույթից հետո համագումարն ինձ ընտրեց հայրենակցական միության փոխնախագահ: Դե ես դեմ չէի, քանզի կարող էի կազմակերպչական օգնություն ցույց տալ կոմիտեին, այն էլ՝ հաճույքով: Դու մի ասա, իմ ելույթն իզուր չանցավ: Ուրեմն ելույթները վերեւներում քննարկվում են: Չզարմանաք, երկու օրից Քոչարյանը մեկնեց Տավուշ, եւ մի քանի օրից իմացանք, որ կառուցվելու է ճանապարհ Իջեւանի կողմից եւ կառուցվեց: Անտարբեր չմնաց նաեւ կաթողիկոսը, քանզի սկսվեցին Վարագավանքի վերականգնողական աշխատանքները… ու վերջ….
Հիմա ես հայտարարում եմ այդ կոմիտեից ինքնակամ դուրս գալու իմ որոշման մասին: Պատճառներ ունեմ: Չկարծեք, թե նեղացած եմ, ես վաղուց ինձ զրկել եմ այդ տհաճ զգացումից, որ ոչ մեկից եւ ոչնչից չեմ նեղանում: Պարզապես հեռանում եմ ու վերջ….»:
Մարիետա Բադալյանին հարցրինք, թե ո՞վ է գլխավորում «Տավուշ» հայրենակցական միությունը: Նա ասաց՝ առողջապահության նախարար Դերենիկ Դումանյանը:
Կարդացեք նաև
Ոսկան ՍԱՐԳՍՅԱՆ
Լուսանկարը՝ Մ. Բադալյանի ֆեյսբուքյան էջից
