«Եթե դուք վերջնաժամկետները բաց թողնեք, մենք ձեզ դատի կտանք», -այսօր քաղաքացիական հասարակության ու լրատվամիջոցների ներկայացուցիչների հետ հանդիպման ժամանակ հայտարարեց Եվրոպական միության ընդլայնման և հարևանության քաղաքականության հարցերով հանձնակատար Շտեֆան Ֆյուլեն` անմիջապես փարատելով ներկաների իրարանցումը` հավելելով, որ հումոր է անում:
Խոսքը Ասոցացման համաձայնագրի ու Եվրոպական Միության հետ Խորը և համապարփակ ազատ առևտրի համաձայնագրի շրջանակներում ստանձնած պարտավորությունների կատարման մասին է: Եվրոպացի պաշտոնյայի խոսքով՝
այդ ուղղությամբ բանակցությունները լուրջ են եղել, որոնք ամիսներ ու տարիներ են տևել: «Սա իրավական պարտադիր ուժ ունեցող փաստաթուղթ է, դրա համար էլ ես ասացի, որ այն պետք է հրապարակվի, բացատրվի իշխանությունների կողմից, բանակցող թիմը պետք բացատրի հասարակությանը, թե այնտեղ ինչ կա ժողովրդի համար: Պետք է բացատրել, թե ինչպես են այս լավ ու դրական բաներն ազդելու դրանց իրականացման միջոցով», -ասաց բանախոսը` հավելելով, որ այդ փաստաթուղթը պետք է վավերացվի Հայաստանի խորհրդարանի, ինչպե նաև ԵՄ բոլոր անդամների կողմից:
Նա վստահեցրեց, որ Եվրոպական Միությունը ստեղծում է բոլոր հնարավորությունները, որ և իշխանությունները, և բոլոր կարևոր դերակատարները կարողանան իրականացնել այդ համաձայնագիրը. «Մենք հստակ ենք ասում, որ հաջորդ ֆինանսական ցիկլում՝ 2014-20 թվականներին մենք ավելի ծավալուն ֆինանսական օժանդակություն կնախատեսենք այն երկրների համար, ովքեր բարեփոխումներին ավելի զարկ կտան Ասոցացման համաձայնագրի շրջանակներում»:
Նելլի ԳՐԻԳՈՐՅԱՆ
