Ավան եւ Նոր Նորք վարչական շրջանների ընդհանուր իրավասության դատարանը դատավոր Դավիթ Հարությունյանի նախագահությամբ այսօր շարունակել է քինգ բոքսինգի աշխարհի չեմպիոն Վարաժ Մանուկյանի դեմ հարուցված քրեական գործով դատական հերթական նիստը:
Նախորդ դատական նիստի ժամանակ, որը տեղի ունեցավ հունիսի 25-ին, մեղադրանքի կողմը վկաներից մեկի համար պաշտպանական միջոց կիրառելու մասին որոշում ընդունեց: Այսօր այն կիրառվել է:
Իբրեւ վկան ներկայացել է դատարան, իբրեւ վկան գտնվել է «կողքի սենյակում», իբրեւ պաշտպանական կողմի հարցերին պատասխանել է` հեռախոսով:
Վարաժ Մանուկյանի պաշտպան, ՀՀ փաստաբանների պալատի անդամ Լուսինե Մարտիրոսյանը մեր զրույցում ասաց, որ դատարան ներկայացած վկային ինքը չի տեսել: Վկան, որը ներկայացել է Գրիգոր Ղազարյան անուն-ազգանունով, դատավորի ձեռքի հեռախոսով, բարձրախոսը միացրած է պատասխանել իր հարցերին: Շատ պատասխաններ ընկալելի չեն եղել:
Կարդացեք նաև
Ըստ պաշտպանի, դա նախադեպ կարող է լինել մյուս քրգործերով, անհիմն պաշտպանական միջոց կիրառելու եւ հանցագործությունը չբացահայտելու համար:
Հիշեցնենք, որ ըստ այս վկայի, ինքը տեսել է, թե ինչպես է Վարաժը դանակով խփել տուժողին:
Խոսքը երկու տարի առաջ սեպտեմբերի 20-ին Նոր Նորքի 4-րդ զանգվածում՝ «Ծիածան» խանութի մոտ վիճաբանության ժամանակ Դավիթ Օհանյանին դանակահարելու, սպանության մասին է:
Կրկին հիշեցնենք, որ այս գործում առկա է միայն Վարաժ Մանուկյանի ինքնախոստովանական ցուցմունքը: Վարաժը, որպես կասկածյալ հարցաքննվելիս չի ունեցել պաշտպան, իսկ առկա տեսաձայնագրումից պարզվել է, որ քննչական գործողություններին մասնակցել են մի խումբ անձինք, բացի քննիչից, կասկածյալին հարցեր են տվել գործով չպարզված անձինք: Արձանագրության մեջ չեն նշվել այն անձանց անունները, որոնք մասնակցել են հարցաքննությանը: Բացի այդ, Վարաժ Մանուկյանը եղել է մարմնական բազմաթիվ վնասվածքներով, որոնք հասցվել են բութ, կոշտ առարկաներով:
Հաջորդ դատական նիստը նշանակվել է հուլիսի 18-ին:
Ի դեպ, պաշտպանական միջոց կիրառելու դեպքում, վկան կարող էր բերվել դատարան, պաշտպանական կողմից վերցվեր ստորագրություն անհատական-անձնական, դատաքննության արդյունքների, մասնավորապես իր հարցաքննության հետ կապված տվյալներ չհրապարակելու մասին, գաղտնիությունն ապահովելու համար:
Ռուզան ՄԻՆԱՍՅԱՆ
