Այսօր Aravot.am-ը ՀՀԿ պատգամավոր, ԱԺ էթիկայի հարցերով ժամանակավոր հանձնաժողովի նախագահ Դավիթ Հարությունյանին հարց ուղղեց՝ ի՞նչ քայլեր են ձեռնարկվելու Մոլդովայի խորհրդարանական փաստաբան Աուրելիա Գրիգորիուի դեմ, արդյոք նրան պատրաստվում են պաշտոնանկ անել: Դավիթ Հարությունյանը պատասխանեց. «Ընդհանրապես ուշադրություն պետք չի դարձնել: Եթե ամեն մի, այսպես ասենք՝ տհասի հայտարարությունը լուրջ ընդունեք, ուրեմն դուք ձեր էներգիան կվատնեք անարդյունավետ»:
Մենք ճշտեցինք՝ այսինքն պետք է արհամարհե՞լ՝ Դավիթ Հարությունյանը պատասխանեց. «Ասելու բան չունեմ, ամեն ինչ ասված է, վերջացած»:
Նախագահը պատրաստվում է մեկնել Մոլդովա, ուստի մենք նաեւ հետաքրքրվեցինք, թե նախագահը պատրաստվո՞ւմ է արդյոք բարձրացնել այնտեղ Աուրելիա Գրիգորիուի հարցը: Դավիթ Հարությունյանն ասաց, որ տեղյակ չէ՝ նա կանդրադառնա՞ այդ թեմային, թե՞ ոչ:
Հիշեցնենք, որ Աուրելիա Գրիգորիուն ՀՀ ԱԺ-ում «Իրավունքի գերակայության եվրոպական չափորոշիչները և իշխանությունների հայեցողության սահմանները Եվրոպայի խորհրդի անդամ երկրներում» թեմայով համաեվրոպական խորհրդաժողովի ժամանակ հայտարարել էր, թե «Հայաստանը գրավել է Ադրբեջանի տարածքների 20 տոկոսը՝ ադրբեջանցիների նկատմամբ իրականացնելով ցեղասպանություն»: Նա նաեւ ասել էր, թե Խոջալուի ցեղասպանությունն իրականացրել են հայերը, ինչն այլևս միջազգայնորեն ճանաչված փաստ է:
Կարդացեք նաև
Այս օրերին էլ Գրիգորիուն ադրբեջանական տարբեր ԶԼՄ-ների հարցազրույցներ է տալիս եւ պատմում նորանոր, իրար հակասող պատմություններ այն մասին, թե իբր իր զեկույցից հետո ինչպես են հայերը հյուրանոցում եւ սոցցանցերում իրեն սկսել ահաբեկել:
Հռիփսիմե ՋԵԲԵՋՅԱՆ
