Իջեւանում, Տավուշի մարզի ընդհանուր իրավասության առաջին ատյանի դատարանում ավարտվեց Իջեւան քաղաքի բնակիչ, 1970թ. ծնված Արսեն Բայրամյանի դատավարությունը: Ա. Բայրամյանին մեղադրանք էր առաջադրվել այն բանի համար, որ նա հանդիսանալով «Բայրամյան» սոցիալական, բարեգործական հասարակական կազմակերպության նախագահը, 2011 թվականի սեպտեմբերի 16-ին եւ 2013 թվականի փետրվարի 12-ին « Վորլդ Վիժն Հայաստան» միջազգային կազմակերպության Տավուշի տարածքային մասնաճյուղից ստացել է հումանիտար օգնության բաշխման ցուցակ եւ պաշտոնական դիրքն օգտագործելով՝ ստորագրությունները կեղծելու միջոցով, յուրացրել է 76 հազար 290 դրամ:
Հուլիսի 10-ին Տավուշի մարզի առաջին ատյանի դատարանի նախագահ Սամվել Մարդանյանը Ա. Բայրամյանին մեղավոր է ճանաչել ՀՀ քրեական օրենսգրքի 179 հոդվածի 2-րդ մասի 1-ին կետով ( «Յուրացնելը կամ վատնելը, որը կատարվել պաշտոնական դիրքն օգտագործելով»), նրան դատապարտել նվազագույն աշխատավարձի հազարապատիկի չափով տուգանքի, նրան 3 տարի զրկելով նյութական պատասխանատու պաշտոններ զբաղեցնելու իրավունքից:
Տավուշի մարզի առաջին ատյանի դատարանից տեղեկացանք, որ Ա. Բայրամյանը վերականգնել է պատճառված շուրջ 76 հազար դրամ վնասը:
Տավուշի մարզի առաջին ատյանի դատարանի վճիռը կարող է բողոքարկվել մեկամսյա ժամկետում:
Կարդացեք նաև
Ոսկան ՍԱՐԳՍՅԱՆ
