«Եկել եմ հաստատ մի որոշմամբ, որ այստեղ եմ մնալու, իմ հոգու տունը չեմ փոխի ոչնչի հետ»,- ասաց դերասանուհի Թամար Հովհաննիսյանը, որն արդեն երկուսուկես ամիս է՝ ինչ ընտանիքով վերադարձել է Հայաստան: Նրա Հայաստան վերադարձի ճանապարհին մեծ դեր է ունեցել որդին, որը որոշել է երեխային մեծացնել հայրենիքում:
Գրականությամբ զինված է եկել: Պատմեց Հայաստանում նախատեսած իր ծրագրերի մասին: Ունի մի քանի հեռուստասցենարներ, որոնք առաջարկել է տեղի հեռուստաընկերություններին: «Այս ծրագրերը ոչ միայն ինձ են պետք, այլ Հայաստանին՝ մշակութային ոլորտին»,- նշեց դերասանուհին:
«Արի ամուսնանանք» պիես է գրել, որտեղ պատմում է այն, թե ինչ է տեսել ԱՄՆ-ի հայ համայնքում, սյուժեն կազմված է իրականության հիման վրա: «Այն, թե ինչ է նշանակում ապրել օտարության մեջ, չես կարողանում հարմարվել, մնում ես օտար մարմին, օտար երկրում»,-ասաց նա:
Թե ինչո՞ւ է հեռացել երկրից, դերասանուհին բացատրում է նրանով, որ իրենց ժամանակաշրջանը դժվարին էր:
Կարդացեք նաև
«Իմ սերնդի կյանքը, եթե համեմատեմ մեզնից առաջ սերնդի հետ, նրանք փառավորապես կայացան, ոչ միայն նրա համար, որ իրենք տաղանդավոր եւ հետաքրքիր էին, այլ խրուշչովյան ձնհալի ժամանակ, երբ շատ դռներ բացվեցին: Տեսեք՝ ինչ արդյունք տվեց, սերնդով մտան ասպարեզ, սերնդով հասունացան: Մենք ասպարեզ մտանք յոթանասունականների կեսերին, եւ երբ մեր հեթն էր, երկիրը փլվեց: Այդ ահռելի կայսրությունը փլվեց մեր սերնդի մեջքին»,- պարզաբանեց Թամար Հովհաննիսյանը:
Ծրագրած նախագծերից կարեւորագույնը համարում է Մհեր Մկրտչյանին նվիրված նյութը, որի սցենարն արդեն պատրաստ է: Դիալոգ է լինելու իրենց երկուսի մեջ, խոսելու է օբյեկտիվի առջեւ, այսինքն՝ Մհեր Մկրտչյանը չի երեւալու: Այն նվիրված է դերասանուհու եւ Մհեր Մկրտչյանի համատեղ կյանքին:
«Այդպես անպատասխանատու ձեւով վերաբերվեցին Մհեր Մկրտչյանի մասին այդ ֆիլմը նկարելով: Տասը փաստ է ներկայացվում, որից ինը սխալ է: Թե Հայաստանում, թե Մոսկվայում, ուղղակի դիտորդ ունենալու հարցը լուծեցին»,- ասաց նա:
Վերադարձը կապում է նաեւ մեծն դերասանի հետ, սակայն չցանկացավ շատ մանրամասնել:
Ինչպես նաեւ գիրք-ալբոմ պետք է անի, ունի որոշ իրեր՝ օրացույց, գրառումներ եւ այլն:
«Մարդկանց ապացուցելու բան չունեմ, դա ինձնից շատ հեռու բան է, ես չեմ իջնի իմ մակարդակից եւ չեմ ասի՝ գիտեք՝ էդ բանը տենց չի եղել, սենց է եղել: Ես իմ կարծիքով ապրող մարդ եմ: Մարդիկ, որ երբեք չեն տեսել ոչ ինձ, ոչ Մհերին, չեն կարող ասել, թե ինչ է եղել: Ես իմ պարտքը կատարած կլինեմ, երբ կվերջացնեմ վերը նշված ծրագրերը»,- հայտնեց դերասանի կինը:
Ռուբինա ՍԱՖԱՐՅԱՆ
