ՀՀ բնապահպանական պետական տեսչության Սյունիքի տարածքային բաժնի պետ Լեւոն Պետրոսյանի փոխանցմամբ՝ Գեղի գետից վերցրած ջրի նմուշի անալիզի արդյունքների համաձայն, Գեղի գետի ջրում կախյալ նյութերի բարձր ցուցանիշ է արձանագրվել:
«Բայց այդ արձանագրված կախյալ նյութերի բարձր ցուցանիշը տեղացած հորդառատ անձրեւների հետեւանքով էր պայմանավորված, ոչ թե՝ պոչատարի պոչերի աղտոտման: Պոչերի առկայություն չի հայտնաբերվել ջրում», – տեղեկացրեց Լեւոն Պետրոսյանը:
Նշենք, որ վերջերս Սյունիքի մարզ ժամանած Համահայկական բնապահպանական ճակատի ակտիվիստները ահազանգել էին, որ Գեղի գետն աղտոտվում է «Լեռ-էքս» ՍՊԸ-ի կողմից շահագործվող պոչամբարի թափոնաջրերով:
«Գեղի գետի ջուրը որոշակի հատվածում հոսում է պլաստմասե խողովակների մեջ եւ անցնում է պոչամբարի կողքով, սակայն խողովակները պայթել են (ամենայն հավանականությամբ՝ գետի վարարման պատճառով), եւ խողովակների ջուրը լցվում է պոչամբարի մեջ, իսկ պոչամբարից՝ խառնվելով թափոնների հետ, այս պահին թափոնաջրերը գնում-լցվում են Գեղի գետը»,- ասված էր հայտարարության մեջ, որի վերաբերյալ նաեւ տեսանյութ են հրապարակել:
Պոչամբարի տարածք կատարած մեր այցի արդյունքների մասին անդրադարձել էինք հետեւյալ հրապարակմաբ՝ https://www.aravot.am/2013/06/29/260213/, որտեղ նշել էինք, որ մեր այցի օրը դեպի Գեղի գետ արտահոսքի հետքեր չեն արձանագրվել, սակայն պարզարանից հոսող ջուրը գունափոխված էր եւ ոչ մաքուր վիճակում էր լցվում Գեղի գետը: Պոչամբարի պատասխանատու Միշա Ավանեսյանն էլ այդ օրը փոխանցել էր, որ խողովակով լեռներից մաքուր ջուր է հոսում եւ վթարի օրը հենց այդ մաքուր ջուրն է լցվել Գեղի գետը, որը հորդառատ տեղումների հետեւանքով էր գունափոխվել ու պոչատարի ջրերին չէր խառնվել՝ ինչպես ներկայացվում էր: Հորդառատ տեղումներն էլ պատճառ էին հանդիսացել պլասմասե խողովակների վթարմանը, որոնք այս պահին փոխարինվում են երկաթե խողովակաշարով՝ հետագա վթարներից զերծ մնալու համար: Նշենք, որ այդ օրերին Կապանի տարածաշրջանում տեղացած հորդառատ անձրեւների հետեւանքով նաեւ երկու կամուրջ էր քանդվել Լեռնաձոր համայնքում, հողատարածքներ ջրով ողողվել, ծառեր վնասվել:
Մերի ՍՈՂՈՄՈՆՅԱՆ
