«Կանանց համար ավելի բարդ է նվեր ընտրել, քան տղամարդկանց», այս կարծիքին են շատ տղամարդիկ, թեև մեզանում ավելի շատ տարածված է հակառակ միտումը: Կանանց համար հե՞շտ է նվեր ընտրել, թե` ոչ, կարևոր չէ, գլխավորն այն է, որ նվերն իսկապես ուրախացնի: Ամեն ինչ ավելի է բարդանում այն դեպքում, երբ տղամարդիկ նվեր են ընտրում իրենց զոքանչի համար 🙂 : «Առավոտ երիտասարդականն» էլ փորձեց օգնել ու հեշտացնել տղամարդկանց գործը: Մենք հետաքրքրվել ենք, թե ո՞ր նվերներն են ուրախացնում զոքանչներին:
Տիկին Հասմիկն իրեն բախտավոր զոքանչ է համարում. «Ես իմ փեսային հարազատ որդուս պես եմ սիրում, – ասում է նա, – ես տղա չունեմ, նա է մեր տան տղան»: Ինչպես տիկին Հասմիկն է փաստում՝ փեսան շատ ուշադիր է իր հանդեպ. «Պարբերաբար ծաղիկներ եմ ստանում նրանից, ծննդայնս օրերին աղջկաս հետ միասին անակնկալներ են մատուցում», – նշում է նա: Վերջին նվերը, որ փեսայից ստացել է ծննդյան օրը, արդուկն է եղել, ասում է. «Հաճելի է, երբ քեզ ճանաչում են ու գիտեն՝ ի՞նչ է պետք»:
Woman.delfi.ua-ն առանձնացրել է նվերներ, որոնք ցանկալի են զոքանչների ու առհասարակ կանանց համար: Ներկայացնում ենք դրանցից մի քանիսը.
Կարդացեք նաև
1.Եթե ձեր զոքանչը աշխույժ կին է և սիրում է սպորտով զբաղվել, նվիրե՛ք նրան մարզասրահի վկայական:
2.Կարելի է նվիրել նաև խոհանոցային տեխնիկա և բաղադրատոմսերի գիրք:
3. Գեղեցիկ ծաղիկները միշտ էլ հաճելի անակնկալ են:
4. Նրան կարող է հիացնել նաև տնային հարդարանքի յուրօրինակ պարագա նվեր ստանալը՝ ինչպես, օրինակ, չինական ծաղկաման, գեղեցիկ անկողնային պարագաներ կամ փոքրիկ սեղան:
«Լավագույն նվերը զոքանչի համար, իմ կարծիքո,վ ծաղիկներն են, – ասում է 27-ամյա Հրանտն ու հավելում, – հատկապես իմ զոքանչի համար, որովհետև նա տան բակում էլ է ծաղիկներ աճեցնում»:
«Ամենալավ նվերը, որ կարող էի անել զոքանչիս համար ,արդեն արել եմ, – ասում է 32-ամյա Սամվելը, – իմ որդին ծնվել է հենց նրա ծննդյան օրը. թոռնիկից էլ լավ նվե՞ր»:
25 –ամյա Ժորայի համար էլ ամենաբարդը հենց զոքանչի համար նվեր ընտրելն է, բայց կարծում է՝ լավ տարբերակ է գտել. «Ես տալիս եմ նրան գումարը, նա էլ գնում է այն, ինչ անհրաժեշտ է իրեն»,- ասում է նա:
Տիգրանուհի Թասլակյան
