Օրերս նախագահ Սերժ Սարգսյանը հանդիպում էր ունեցել Հանրային խորհրդի անդամների հետ եւ քննարկել խորհրդի աշխատանքները, դրանց արդյունավետությունը: Վազգեն Մանուկյանը նախագահին ասել էր, որ անհրաժեշտ է օրենք ընդունել «Հանրային խորհրդի մասին», նաեւ դժգոհել, որ ստեղծումից ի վեր իրենց կառույցի նկատմամբ թերահավատ մոտեցում կա եւ քննադատություններ: Վազգեն Մանուկյանի խոսքերով՝ «Աշնանն ավարտելով մեր աշխատանքը՝ մենք հասարակությանը եւ նախագահին կներկայացնենք 4 տարվա մեր ամբողջ գործունեության արդյունքները եւ հուսով եմ, արդեն աշնանը կունենանք օրենք Հանրային խորհրդի մասին, համենայնդեպս, նախագիծն աշնան սկզբին կներկայացվի Ազգային ժողով»:
Այսօր Aravot.am-ը Վազգեն Մանուկյանից հետաքրքրվեց՝ սա նշանակում է, որ աշնանն արդեն Հանրային խորհուրդն ավարտո՞ւմ է իր աշխատանքները եւ այլեւս չի՞ գործելու: Վազգեն Մանուկյանը պատասխանեց, որ դա լինելու է դեկտեմբերին, բայց իրենք միայն ամփոփելու են 4 տարվա գործունեությունը եւ հնարավորություն են ստանալու եւս 4 տարի կատարելու այն գործառույթները, ինչ կատարում էին: Այսինքն, Հանրային խորհուրդը չի փակվելու. «Մենք կարծում ենք, որ նոր օրենք կընդունվի, եւ Հանրային խորհուրդն արդեն նոր օրենքով կգործի: Մենք գտնում ենք, որ ճիշտ կլինի, եթե օրենքի միջոցով դա արվի: Մենք շարունակելու ենք կատարել մեր վրա դրված լիազորությունները եւ պարտականությունները»:
Մենք պարոն Մանուկյանից նաեւ հետաքրքրվեցինք, թե ինչպե՞ս է մեկնաբանում այն, որ ԲՈՀ գործակալության պետ Արտուշ Ղուկասյանի հարցի քննարկումից եւ Հանրային խորհրդի որոշումից հետո էլ Արմեն Աշոտյանը, միեւնույն է, ազատեց նրան աշխատանքից: Վազգեն Մանուկյանը վստահեցրեց, որ ինքը դրա պատասխանը կտա մեկ-երկու օրից, բայց անպայման կտա իր եզրակացությունը:
Հռիփսիմե ՋԵԲԵՋՅԱՆ
